മട്ടാഞ്ചേരി:  മുച്ചക്ര വാഹനങ്ങളുടെ സ്‌പെയര്‍ പാര്‍ട്‌സുകള്‍ വില്‍ക്കുന്ന കടക്ക് തീപിടിച്ചു.
ചക്കാമാടം കവലയില്‍ അബ്ദുല്‍ മജീദിന്റെ ഉടമസ്ഥതയിലുള്ള എസ്.എം. സ്‌പെയേഴ്‌സിനാണ് തീപിടിച്ചത്.ഞായറാഴ്ച പുലര്‍ച്ചെ ഒരു മണിയോടെയാണ് കടക്ക് തീ പിടിച്ചത്.
സമീപത്തെ വീട്ടുകാര്‍ വിവരം അറിയിച്ചതിനെ തുടര്‍ന്ന് മട്ടാഞ്ചേരി ,ഫോര്‍ട്ടുകൊച്ചി എന്നിവിടങ്ങളില്‍ നിന്ന് അഗ്‌നിശമന സേനയുടെ രണ്ടു യൂനിറ്റുകള്‍ എത്തിയാണ് തീ കെടുത്തിയത്. ഷോട്ട് സര്‍ക്യൂട്ടാണ് കാരണമെന്നാണ് ഫയര്‍ഫോഴ്‌സിന്റെ നിഗമനം.
കടയില്‍ ഉണ്ടായിരുന്ന ഓയില്‍ ടിന്നുകള്‍ക്ക് തീപിടിച്ചതോടെ സ്‌പെയര്‍ പാര്‍ട്ടുകള്‍, ബയറിംങ്ങുകള്‍ എന്നിവയും നശിച്ചു. തീ കെടുത്താന്‍ കടയിലേക്ക് വെള്ളം പമ്പു ചെയ്തതോടെ അവശേഷിക്കുന്ന സ്‌പെയറുകളും ഉപയോഗശൂന്യമായിരിക്കയാണെന്ന് ഉടമ മജീദ് പറഞ്ഞു.
ഏഴര ലക്ഷം രൂപയുടെ നഷടമുണ്ടായതായി ഉടമ അവകാശപ്പെട്ടു. സ്റ്റേഷന്‍ ആഫീസര്‍ കെ.ജെ.തോമസ്, അസി. ആഫീസര്‍ ഗോപകുമാര്‍, ലീഡിംഗ് ഫയര്‍മാന്‍ ജോസ്, ഫയര്‍മാന്‍മാരായ എം.എന്‍.വിനോദ്കുമാര്‍, രതീശ് ,അന്‍വിന്‍ ശിവകുമാര്‍ ,ഐ.പി.ജേക്കബ് എന്നിവരടങ്ങുന്ന സംഘമാണ് തീ അണച്ചത്.