തളിപ്പറമ്പ്: വയോധികരെ കബളിപ്പിച്ച് സ്വര്‍ണവും പണവും തട്ടിയെടുത്ത കേസില്‍ അറസ്റ്റിലായ പ്രതിയെ റിമാന്‍ഡ് ചെയ്തു. കാസര്‍കോട് ഉപ്പളയിലെ മുസ്തഫയെ വെള്ളിയാഴ്ച വൈകുന്നേരം കാസര്‍കോട് റെയില്‍വേ സ്റ്റേഷനിലേക്ക് തന്ത്രപൂര്‍വം വിളിച്ചുവരുത്തി തളിപ്പറമ്പ് എസ്.ഐ ബിനു മോഹന്റെ നേതൃത്വത്തിലുളള സംഘം പിടികൂടിയത്.
സംസ്ഥാനത്ത് ആദ്യമായി പ്രതിയെ കണ്ടെത്താനായി ട്രോളുകള്‍ ഇറക്കിയെന്ന പ്രത്യേകതയും ഈ കേസിനുണ്ട്. മുസ്തഫയുടെ സി.സി.ടി.വി ദൃശ്യങ്ങളാണ് ആദ്യം പൊലിസിന് ലഭിച്ചത്. തുടര്‍ന്ന് സുപ്രഭാതം റിപ്പോര്‍ട്ടറായ ഗണേഷ് പയ്യന്നൂരിനെ ഉപയോഗിച്ച് സിനിമാതാരങ്ങളുടെ ചിത്രം ഉപയോഗിച്ച് സംസ്ഥാനത്ത് ആദ്യമായി പ്രതിയെ കണ്ടെത്താനായി ട്രോളുകളും ഇറക്കി. ഇത് സമൂഹമാധ്യമങ്ങളില്‍ പ്രചരിപ്പിച്ചതോടെ പ്രതിയിലേക്കുള്ള വഴി എളുപ്പമായി.
ഇത് ശ്രദ്ധയില്‍പെട്ട മുന്‍ പൊലിസ് ഉദ്യോഗസ്ഥന്‍ പ്രതിയെ തിരിച്ചറിയുകയായിരുന്നു. ആദ്യം പ്രതിയെ തിരിച്ചറിയാന്‍ പൊലിസ് ബുദ്ധിമുട്ടി. സോഷ്യല്‍ മീഡിയ വഴി ചിത്രങ്ങള്‍ പ്രചരിപ്പിച്ചതോടെ രൂപമാറ്റം വരുത്തിയിരുന്നു. പിന്നീട് ഫോണ്‍ പരിശോധിച്ചാണ് മുസ്തഫയാണെന്ന് ഉറപ്പിച്ചത്.