കണ്ണൂര്‍: നദി മരിക്കുന്ന നാട്ടില്‍ പ്രകൃതി മനുഷ്യനു നല്‍കുന്ന ശിക്ഷയാണ് വരള്‍ച്ചയെന്ന് സാഹിത്യകാരന്‍ സി.വി ബാലകൃഷ്ണന്‍. മനുഷ്യന്‍ വെറുംയന്ത്രങ്ങളായി മാറിയതോടെ നദികള്‍ അഴുക്കുചാലുകളായി മാറി. ലോകം മുഴുവന്‍ നദികളെയും ജലാശയങ്ങളേയും ബഹുമാനിക്കുന്ന ജനങ്ങള്‍ ഉണ്ടാകുമ്പോള്‍ ഇവിടെ ടോയ്‌ലറ്റ് ഓടകള്‍ വരെ നദികളിലേക്ക് തുറന്നു വിടുകയാണെന്നും അദ്ദേഹം പറഞ്ഞു. ജില്ലാ കോണ്‍ഗ്രസ് കമ്മിറ്റിയുടെ ജലഹസ്തം പദ്ധതി ജില്ലാതല ഉദ്ഘാടനം നിര്‍വഹിക്കുകയായിരുന്നു അദ്ദേഹം. ജല സാക്ഷരതാ പ്രവര്‍ത്തനം അടിയന്തിരമായി ആരംഭിക്കണം. ഫാക്ടറികളിലെയും മറ്റും മാലിന്യങ്ങള്‍ ഒഴുക്കിവിട്ടതിനെത്തുടര്‍ന്ന് 379 ഹെക്ടര്‍ വിസ്തൃതിയുള്ള കര്‍ണാടകയിലെ ബൈലന്തൂര്‍ തടാകത്തില്‍ നിന്ന് ഇപ്പോള്‍ പുക ഉയരുകയാണെന്നും സി.വി ബാലകൃഷ്ണന്‍ പറഞ്ഞു. ഡി.സി.സി പ്രസിഡന്റ് സതീശന്‍ പാച്ചേനി അധ്യക്ഷനായി. കെ.പി.സി.സി ജനറല്‍ സെക്രട്ടറിമാരായ പി രാമകൃഷ്ണന്‍, സുമാ ബാലകൃഷ്ണന്‍, വി.എ നാരായണന്‍, കെ സുരേന്ദ്രന്‍ സംസാരിച്ചു. തുടര്‍ന്ന് അഴീക്കോട് വന്‍കുളം ശുചീകരണ പ്രവൃത്തി നടത്തി.