ആലക്കോട്: കേരളാ പൊലിസ് ആദ്യമായി ഒരുക്കുന്ന ബോധവല്ക്കരണ സിനിമയുടെ ചിത്രീകരണം ആലക്കോടും പരിസരപ്രദേശങ്ങളിലുമായി ആരംഭിച്ചു.  പ്രശസ്ത സിനിമാ താരം സൈജു കുറുപ്പ് പ്രധാന കഥാപാത്രത്തെ അവതരിപ്പിക്കുന്ന സിനിമ യുവസംവിധായകന്‍ അന്ഷാദ് കരുവഞ്ചാലാണ് സംവിധാനം
ചെയ്യുന്നത്.
സ്ത്രീ സുരക്ഷ, റോഡ് സുരക്ഷ, കുട്ടികളുടെ സുരക്ഷ എന്നീ വിഷയങ്ങള്‍ ആസ്പദമാക്കി തിരുവനന്തപുരം എ.ഐ.ജി ഹരിശങ്കര്‍ ഐ.പി.എസിന്റെ തിരക്കഥയിലാണ് സിനിമ ഒരുങ്ങുന്നത്. സിനിമയുടെ രണ്ടാം ദിവസത്തെ ചിത്രീകരണം നടന്നത് ആലക്കോട് പൊലിസ് സ്റ്റേഷനിലാണ്. പരാതിയുമായി സ്റ്റേഷനില്‍ എത്തിയവര്‍ ആദ്യമൊന്നമ്പരന്നുവെങ്കിലും സംഗതി ബോധ്യപെട്ടതോടെ പലര്‍ക്കും  കൗതുകമായി.
സര്‍ക്കിള്‍ ഇന്‍സ്‌പെക്ടറായാണ് സൈജു കുറുപ്പ് സിനിമയില്‍ വേഷമിടുന്നത്. കുടിയാന്മല സ്റ്റേഷനിലെ സിവില്‍ പൊലിസ് ഓഫിസര്‍ സദാനന്ദനും പൊലിസ് ഓഫീസറായി സിനിമയില്‍ അഭിനയിച്ചു. ആലക്കോട് സര്‍ക്കിള്‍ ഇന്‌സ്‌പെക്ടര്‍ ഇ.പി സുരേ
ശനും, സബ് ഇന്‍സ്‌പെക്ടര്‍ കെ.ജെ ബിനോയിയും സിനിമാ പ്രവര്‍ത്തകര്‍ക്ക് വേണ്ട സഹായങ്ങള്‍ നല്‍കി.
സ്റ്റേഷനില്‍ ആദ്യമായി നടക്കുന്ന സിനിമാ ചിത്രീകരണം കാണാന്‍ നാട്ടുകാരും എത്തിയിരുന്നു. വിജിലേഷ്, അച്യുതന്‍, ജയശങ്കര്‍, ഡോ.രഞ്ജീവ്, സുമില്‍ എന്നിവരും സിനിമയില്‍ അഭിനയിക്കുന്നുണ്ട്. ഷാസ് പ്രൊഡക്ഷന്റെ ബാനറില്‍ ഷബീബ് ഖാലിദ് നിര്‍മിക്കുന്ന സിനിമ ഏപ്രില്‍ അവസാന വാരം പ്രദര്‍ശനത്തിനെത്തും.