ശ്രീനഗര്‍: കുറ്റവാളികളെ തൂക്കിലേറ്റുക, അല്ലെങ്കില്‍ ഞങ്ങളെ വെടിവച്ച് കൊല്ലുകയെന്ന് കത്‌വ പെണ്‍കുട്ടിയുടെ മാതാവ്. ഇവിടെ നീതിയില്ലെങ്കില്‍ ഞങ്ങളെ വെടിവെച്ച് കൊല്ലണമെന്ന് അവര്‍ ദേശീയ മാധ്യമത്തിന് നല്‍കിയ അഭിമുഖത്തില്‍ പറഞ്ഞു. പ്രതികളെ വിട്ടയക്കുകയാണെങ്കില്‍ അവര്‍ തങ്ങളെ കൊലപ്പെടുത്തും. നാല് ഗ്രാങ്ങളിലെ ജനങ്ങള്‍ ഞങ്ങള്‍ക്ക് പിന്നാലെയുണ്ട്. ഞങ്ങള്‍ ആകെ നാല് പേര്‍ മാത്രമേയുള്ളൂ. വീടും, സ്വത്തും എല്ലാം നഷ്ടപ്പെട്ടുവെന്ന് മാതാവ് പറഞ്ഞു.
കേസ് ക്രൈംബ്രാഞ്ചില്‍ നിന്ന് സി.ബി.ഐക്ക് വിടണമെന്ന് പ്രാദേശിക രാഷ്ട്രീയക്കാരില്‍ നിന്ന് സമ്മര്‍ദമുണ്ട്. നിലവിലെ അന്വേഷണം തുടരാനാണ് ഞങ്ങള്‍ ആവശ്യപ്പെടുന്നത്.
കുറ്റവാളികളെ സംരക്ഷിക്കാനാണ് കേസ് സി.ബി.ഐക്ക് വിടാന്‍ അവര്‍ സമ്മര്‍ദം ചെലുത്തുന്നതെന്ന് പെണ്‍കുട്ടിയുടെ മാതാവ് ആരോപിച്ചു. സംഭവത്തില്‍ പരാതി കൊടുത്ത ഉടനെ നടപടി സ്വീകരിച്ചിരുന്നുവെങ്കില്‍ കുട്ടിയെ രക്ഷിക്കാമായിരുന്നു. പക്ഷെ ഏഴ് ദിവസത്തോളം നടപടിക്കായി പൊലിസ് കാത്തിരുന്നുവെന്നും അവര്‍ കുറ്റപ്പെടുത്തി. പിടിയിലായ ആരും നിരപരാധികളല്ലെന്നും അവര്‍ പറഞ്ഞു.
അതിന്നിടെ കുറ്റവാളികള്‍ക്ക് അനുകൂല നീക്കവുമായി ബി.ജെ.പി വീണ്ടും രംഗത്തെത്തി. ക്രൈംബ്രാഞ്ച് അന്വേഷണത്തെ വിമര്‍ശിക്കുന്ന, സി.ബി.ഐ അന്വേഷണത്തിനായി ആവശ്യപ്പെടുന്ന വിഡിയോ കാംപിയിനുമായാണ് ബി.ജെ.പി കശ്മിര്‍ യൂനിറ്റ് രംഗത്തെത്തിയത്.
യൂനിറ്റിന്റെ ഔദ്യോഗിക വെബ്‌സൈറ്റില്‍ ഈ വിഡിയോ അപ്‌ലോഡ് ചെയ്തിട്ടുണ്ട്. നേരത്തെ കേസിലെ പ്രതികള്‍ക്കായി ബി.ജെ.പി മന്ത്രിമാരുടെ നേതൃത്വത്തില്‍ റാലി നടത്തിയത് വന്‍ വിവാദമായിരുന്നു. ഇവരെ പുറത്താക്കി ഒരു മാസത്തിനുള്ളിലാണ് പ്രതികള്‍ക്കായി വീണ്ടും ബി.ജെ.പി രംഗത്തെത്തിയത്.