ഇന്‍ഡോര്‍: ഐ.പി.ല്‍ പോരാട്ടത്തില്‍ രാജസ്ഥാന്‍ റോയല്‍സിനെതിരേ കിങ്‌സ് ഇലവന്‍ പഞ്ചാബിന് ആറ് വിക്കറ്റ് വിജയം. ആദ്യം ബാറ്റ് ചെയ്ത രാജസ്ഥാന്‍ നിശ്ചിത 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 152 റണ്‍സെടുത്തു. പഞ്ചാബ് 18.4 ഓവറില്‍ നാല് വിക്കറ്റ് നഷ്ടത്തില്‍ 155 റണ്‍സെടുത്താണ് വിജയിച്ചത്. പുറത്താകാതെ 54 പന്തില്‍ 84 റണ്‍സെടുത്ത കെ.എല്‍ രാഹുലിന്റെ മികവിലാണ് പഞ്ചാബിന്റെ വിജയം. കരുണ്‍ നായര്‍ 31 റണ്‍സെടുത്തു.
ടോസ് നേടി പഞ്ചാബ് ബൗളിങ് തിരഞ്ഞെടുക്കുകയായിരുന്നു. ജോസ് ബട്‌ലറുടെ (39 പന്തില്‍ 51 റണ്‍സ്) മികവിലാണ് രാജസ്ഥാന്‍ പൊരുതാവുന്ന സ്‌കോര്‍ സ്വന്തമാക്കിയത്. സഞ്ജു സാംസണ്‍ 23 പന്തില്‍ 28 റണ്‍സ് നേടി. വാലറ്റത്ത് 24 റണ്‍സെടുത്ത് ശ്രേയസ് ഗോപാലും തിളങ്ങി. പഞ്ചാബിന് വേണ്ടി മുജീബ് റഹ്മാന്‍ നാലോവറില്‍ 27 റണ്‍സ് വഴങ്ങി മൂന്ന് വിക്കറ്റ് വീഴ്ത്തി.