മുംബൈ: സ്വന്തം തട്ടകത്തില്‍ കൊല്‍ക്കത്ത നൈറ്റ് റൈഡേഴ്‌സിനെ 13 റണ്‍സിന് വീഴ്ത്തി മുംബൈ ഇന്ത്യന്‍സ് സെമി പ്രതീക്ഷ നിലനിര്‍ത്തി. ആദ്യം ബാറ്റ് ചെയ്ത മുംബൈ നിശ്ചിത 20 ഓവറില്‍ നാല് വിക്കറ്റ് നഷ്ടത്തില്‍ 181 റണ്‍സെന്ന മികച്ച സ്‌കോര്‍ സ്വന്തമാക്കി. 

മറുപടി പറഞ്ഞ കൊല്‍ക്കത്തയുടെ പോരാട്ടം 20 ഓവറില്‍ ആറ് വിക്കറ്റ് നഷ്ടത്തില്‍ 168 റണ്‍സില്‍ അവസാനിച്ചു. ഓള്‍റൗണ്ട് പ്രകടനവുമായി കളം നിറഞ്ഞ ഹര്‍ദിക് പാണ്ഡ്യയുടെ മികവാണ് മുംബൈക്ക് നാലാം വിജയം സമ്മാനിച്ചത്.
വിജയത്തിലേക്ക് കുതിക്കുകയായിരുന്ന കൊല്‍ക്കത്തയെ അവസാന നിമിഷങ്ങളില്‍ മികച്ച ബൗളിങിലൂടെ പിടിച്ചുനിര്‍ത്തിയത് മുംബൈക്ക് മുന്‍തൂക്കം നല്‍കി. റോബിന്‍ ഉത്തപ്പയാണ് കൊല്‍ക്കത്തയുടെ ടോപ് സ്‌കോറര്‍. താരം 35 പന്തില്‍ 54 റണ്‍സെടുത്തു.
ക്യാപ്റ്റന്‍ ദിനേഷ് കാര്‍ത്തിക് പുറത്താകാതെ ഒരറ്റം കാത്ത് ടീമിനായി കിണഞ്ഞു ശ്രമിച്ചെങ്കിലും അന്തിമ വിജയത്തിലെത്തിക്കാന്‍ സാധിച്ചില്ല. കാര്‍ത്തിക് 26 പന്തില്‍ 36 റണ്‍സെടുത്തു. നിതീഷ് റാണ 31 റണ്‍സുമായും തിളങ്ങി. നാലോവറില്‍ 19 റണ്‍സ് മാത്രം വഴങ്ങി ഹര്‍ദിക് രണ്ട് വിക്കറ്റെടുത്തു. മക്ക്ലനാഗന്‍, ബുമ്‌റ, ക്രുണല്‍ പാണ്ഡ്യ, മയാങ്ക് മാര്‍കണ്ഡെ എന്നിവര്‍ ഓരോ വിക്കറ്റെടുത്തു.
ടോസ് നേടിയ കൊല്‍ക്കത്ത മുംബൈയെ ബാറ്റിങിനയക്കുകയായിരുന്നു. സൂര്യകുമാര്‍ യാദവ് (39 പന്തില്‍ 59), എവിന്‍ ലൂയീസ് (43) എന്നിവര്‍ മികച്ച തുടക്കമാണ് മുംബൈക്ക് നല്‍കിയത്. പിന്നീട് ഹര്‍ദിക് പാണ്ഡ്യ 20 പന്തില്‍ 35 റണ്‍സുമായി പുറത്താകാതെ നിന്ന് മുംബൈ സ്‌കോര്‍ 181ല്‍ എത്തിക്കുകയായിരുന്നു. ഹര്‍ദികാണ് കളിയിലെ കേമന്‍.