പൂക്കോട്ടുംപാടം: പാറക്കപ്പാടത്ത് കിണറ്റില്‍വീണ് യുവാക്കള്‍ക്കു പരുക്കേറ്റു. പാറക്കപ്പാടം മുടക്കയില്‍ ഷബീറലി (37), ചെറളക്കുണ്ടന്‍ അബ്ബാസ് (44) എന്നിവര്‍ക്കാണ് പരുക്കേറ്റത്. ഇന്നലെ രാവിലെ പതിനൊന്നോടെയാണ് സംഭവം. സമീപവാസിയുടെ കിണര്‍ നന്നാക്കാനായി ഇറങ്ങിയതായിരുന്നു. കയറുന്നതിനിടെ തൂണ്‍പൊട്ടിയാണ് വീണത്. 55 അടിയോളം താഴ്ചയിലുള്ള പഴയ കിണറാണിത്. കഴുത്തിനും തുടയ്ക്കും പരുക്കേറ്റ ഷബീറലിയെ കോഴിക്കോട് മെഡിക്കല്‍ കോളജ് ആശുപത്രിയിലും വിവിധ ഭാഗങ്ങളിലായി ചതവ് സംഭവിച്ച അബ്ബാസിനെ നിലമ്പൂര്‍ ജില്ലാ ആശുപത്രിയിലും പ്രവേശിപ്പിച്ചു. നാട്ടുകാരും നിലമ്പൂരില്‍നിന്നെത്തിയ അഗ്‌നിശമനസേനയും പൂക്കോട്ടുംപാടം പൊലിസും രക്ഷാപ്രവര്‍ത്തനങ്ങള്‍ക്കു നേതൃത്വം നല്‍കി.
നിലമ്പൂര്‍ ഫയര്‍സ്‌റ്റേഷന്‍ ഓഫിസര്‍ അബ്ദുല്‍ ഗഫൂര്‍, ഉദ്യോഗസ്ഥരായ എ.എസ് പ്രദീപ്, പി.ടി ശ്രീജേഷ്, ടി.പി പ്രശാന്ത്, റിനീഷ്, ഇല്ല്യാസ് എന്നിവരും നാട്ടുകാരായ സലീം പടുപ്പുങ്ങള്‍, മഠത്തില്‍ സലീം, കാരക്കുഴിയില്‍ ഫസല്‍ തുടങ്ങിയവരും ചേര്‍ന്നാണ് ഇവരെ രക്ഷപ്പെടുത്തിയത്. ഗ്രാമപഞ്ചായത്ത് വൈസ്പ്രസിഡന്റ് നൊട്ടത്ത് മുഹമ്മദും സ്ഥലത്തെത്തിയിരുന്നു.