കൊച്ചി: പൂക്കോട് വെറ്ററിനറി സര്‍വ്വകലാശാല വിദ്യാര്‍ഥി സിദ്ധാര്‍ഥന്റെ മരണത്തില്‍ സിബിഐക്ക് വേണ്ട സൗകര്യം ഉറപ്പാക്കണമെന്ന് ഹൈക്കോടതി. സര്‍ക്കാരിനും സംസ്ഥാന പൊലീസ് മേധാവിക്കുമാണ് ഹൈക്കോടതി  സിംഗിള്‍ ബഞ്ച് നിര്‍ദ്ദേശം നല്‍കിയത്. കേസില്‍ അന്വേഷണം തുടങ്ങിയതായും ഡല്‍ഹി യൂണിറ്റ് കേസ് അന്വഷിക്കുന്നതിനാല്‍ പൊലീസ് സഹായം വേണ്ടിവരുമെന്നും സിബിഐ കോടതിയെ അറിയിച്ചു. സിബിഐ രേഖാമൂലം ആവശ്യപ്പെട്ടാല്‍ എല്ലാ സഹായവും നല്‍കണമെന്ന് ജസ്റ്റിസ് ബച്ചു കുര്യന്‍ തോമസ് പറഞ്ഞു. 

അതേസമയം സിദ്ധാര്‍ഥന്റെ മരണത്തില്‍ കേസ് ഏറ്റെടുത്ത് മൂന്നാം നാള്‍ സിബിഐ കോടതിയില്‍ എഫ്‌ഐആര്‍ സമര്‍പ്പിച്ചിരുന്നു. മാനന്തവാടി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയിലാണ് സി ബി ഐ സിദ്ധാര്‍ഥന്‍ കേസിലെ എഫ് ഐ ആര്‍ സമര്‍പ്പിച്ചത്. ആകെ 21 പ്രതികളെ ഉള്‍പ്പെടുത്തിയാണ് എഫ് ഐ ആര്‍ ഇട്ടിരിക്കുന്നത്. 

നേരത്തെ കേസ് അന്വേഷിച്ച കല്‍പ്പറ്റ ഡിവൈഎസ്പിയുടെ നേതൃത്വത്തിലുള്ള പൊലിസ് 20 പേരെയാണ് പ്രതി ചേര്‍ത്തിരുന്നത്. ഇവര്‍ക്ക് പുറമെ ഒരാള്‍ കൂടി സിബിഐയുടെ പ്രതിപ്പട്ടികയിലുണ്ട്. എന്നാല്‍ ഇയാളുടെ പേര് പരാമര്‍ശിച്ചിട്ടില്ല. കൊലപാതകം അടക്കമുള്ള വകുപ്പുകള്‍ ഇപ്പോള്‍ ഉള്‍പ്പെടുത്തിയിട്ടില്ല. കേസന്വേഷണത്തിന്റെ പുരോഗതി അനുസരിച്ചാകും വകുപ്പുകള്‍ കൂട്ടിച്ചേര്‍ക്കുക. സിബിഐ ഡല്‍ഹി സ്‌പെഷ്യല്‍ യൂണിറ്റ് 2 ആണ് കേസ് അന്വേഷിക്കുന്നത്.