ലണ്ടന്‍: ബ്രിട്ടന്‍ യൂറോപ്യന്‍ യൂണിയനില്‍ തുടരണോ പിന്മാറണോ എന്ന കാര്യത്തില്‍ ജനാഭിപ്രായമറിയാനുള്ള ഹിതപരിശോധന തുടങ്ങി. 4.65 കോടി വോട്ടര്‍മാരാണ് ഇക്കാര്യത്തില്‍ തീരുമാനം അറിയിച്ച് വോട്ടുചെയ്യുക. ബ്രിട്ടന്‍ സമയം രാവിലെ ഏഴു മണിക്കാണ് വോട്ടിങ് ആരംഭിച്ചത്. രാത്രി പത്തു മണിവരെ വോട്ടെടുപ്പ് തുടരും. എക്‌സിറ്റ് പോളുകള്‍ ഇല്ലാത്തതിനാല്‍ വോട്ടിങ് അവസാനിച്ചശേഷം മാത്രമായിരിക്കും പോളിങ് വിവരങ്ങള്‍ അറിയാനാവൂ. വെള്ളിയാഴ്ച രാവിലെയോടെ അന്തിമ ഫലവും അറിയാനാവും.

പ്രധാനമന്ത്രി ഡേവിഡ് കാമറൂണിന്റെ നേതൃത്വത്തിലുള്ള തുടരണമെന്ന വിഭാഗവും പ്രതിപക്ഷാംഗമായ ബോറിസ് ജോണ്‍സന്‍ നേതൃത്വം നല്‍കുന്ന പിന്മാറണമെന്ന വിഭാഗവും രാജ്യമൊട്ടാകെ വ്യാപകമായ പ്രചാരണം നടത്തിയിരുന്നു. ഹിതപരിശോധനയുടെ ഔദ്യോഗിക പ്രചാരണം ചൊവ്വാഴ്ച സമാപിച്ചിരുന്നു.

ആദ്യഘട്ട സര്‍വേകളില്‍ ബ്രിട്ടന്‍ യൂറോപ്യന്‍ യൂനിയനില്‍നിന്നു പിന്മാറണമെന്ന വാദത്തിനാണു ഭൂരിപക്ഷം ലഭിച്ചതെങ്കില്‍ കൊട്ടിക്കലാശത്തിലേക്കു നീങ്ങുമ്പോള്‍ കാമറൂണിന്റെ പക്ഷം നേട്ടമുണ്ടാക്കിയതായാണു സൂചന.