പാലക്കട്: പാലന ഹോസ്പിറ്റലിലെ നഴ്‌സ്മാരടക്കമുളള ജീവനക്കാരുടെ ആത്മഹത്യയും ആത്മഹത്യാശ്രമവുമായി ബന്ധപ്പെട്ട് നിലനില്‍ക്കുന്ന ദുരൂഹത നീക്കി കുറ്റവാളികളെ നിയമത്തിന് മുന്നില്‍ കൊണ്ടുവരാനും ഇരകള്‍ക്ക് നീതി ഉറപ്പാക്കാനും ഭരണാധികാരികള്‍ തയ്യാറാകണമെന്ന് അഖിലേന്ത്യാ മഹിളാ സംസ്‌കാരിക സംഘടന (എ.ഐ.എം.എസ്.എസ്) ജില്ലാക്കമ്മിറ്റി ആവശ്യപ്പെട്ടു.
വാളയാര്‍ സംഭവത്തില്‍ സമയോചിതം ഇടപെടുന്നതില്‍ പോലീസിന്റെ ഭാഗത്ത് വീഴ്ചയുണ്ടായി എന്ന് ഭരണകക്ഷിനേതാക്കള്‍ തന്നെ തുറന്നുപറഞ്ഞിരിക്കുന്ന പശ്ചാത്തലത്തില്‍ അതേ തെറ്റ് ആവര്‍ത്തിക്കപ്പെടുന്നതായി കാണുന്നത് പ്രതിഷേധാര്‍ഹമാണ്.
പാലനയിലെ പീഡനങ്ങളുടെ കാര്യത്തില്‍, ഇരകളോ ബന്ധുക്കളോ രേഖാമൂലം പരാതിപ്പെടാന്‍ പോലും ഭയപ്പെടുന്നതായിട്ടാണ് അറിയാന്‍ കഴിഞ്ഞത്.
പണവും സ്വാധീനവുമുള്ള കുറ്റവാളികള്‍ക്ക് നീതിന്യായ പ്രക്രിയയെ അട്ടിമറിക്കാന്‍ കഴിയുന്നത് ആശങ്കാജനകമായ സ്ഥിതിവിശേഷമാണ്. ഈ സാഹചര്യത്തില്‍, നിയമവാഴ്ച ഉറപ്പാക്കാന്‍ ഭരണഘടനാപരമായി ബാദ്ധ്യതപ്പെട്ട അധികൃതര്‍ വെറും കാഴ്ചക്കാരായി നില്‍ക്കുന്നത് കുറ്റകരമാണ് - അവര്‍ പറഞ്ഞു.
എന്‍. സുഗന്ധിയുടെ അധ്യക്ഷതയില്‍ നടന്ന യോഗത്തില്‍ കെ.എം. ബീവി, കെ.ആര്‍. രജിത, എ. ഹസീന സംസാരിച്ചു.