അരീക്കോട്: സാമൂഹിക സുരക്ഷാ പെന്‍ഷനുള്ള അപേക്ഷ പരിഗണിക്കുന്നതിനുള്ള അപ്രഖ്യാപിത വിലക്കില്‍ പ്രതിഷേധിച്ച് അരീക്കോട് പഞ്ചായത്ത് സംസ്ഥാന സര്‍ക്കാരിനെതിരെ പ്രമേയം പാസാക്കി. പതിനാലാം വാര്‍ഡംഗം ഉമര്‍ വെള്ളേരി അവതരിപ്പിച്ച പ്രമേയത്തെ യു.ഡി.എഫിലെ പത്ത് അംഗങ്ങളും എല്‍.ഡി.എഫിലെ ആറ് അംഗങ്ങളും പിന്തുണച്ചതോടെ ഐക്യകണ്‌ഠ്യേന പാസാക്കുകയായിരുന്നു. ധനവകുപ്പിന് കീഴിലുള്ള ഡി.ബി.ടി സെല്ലിലെ സേവന സോഫ്റ്റ് വെയര്‍ ഒരു വര്‍ഷം മുന്‍പ് ബ്ലോക്ക് ചെയ്തതാണ് ക്ഷേമ പെന്‍ഷനുകള്‍ക്കായി അപേക്ഷ സമര്‍പ്പിക്കുന്നതിന് തടസമായത്. സര്‍ക്കാരിനെതിരെയുള്ള പ്രമേയത്തെ ഇടത് അംഗങ്ങള്‍ അനുകൂലിച്ചത് ചര്‍ച്ചയായതോടെ പ്രമേയത്തെ പിന്തുണച്ചിട്ടില്ലെന്നും പകരം എതിര്‍ക്കുകയാണുണ്ടായതെന്നുമാണ് ഇടത് അംഗങ്ങളുടെ വിശദീകരണം.
യോഗത്തില്‍ പഞ്ചായത്ത് പ്രസിഡന്റ് അമ്പാഴത്തിങ്ങല്‍ മുനീറ, എ.ഡബ്ലിയു അബ്ദുറഹ്മാന്‍, സറീന ജാഫര്‍, വി.പി സുഹൈര്‍, ഉമര്‍ വെള്ളേരി, എ.എം ഷാഫി, കെ.രതീഷ്, കെ.പി ഫാത്തിമക്കുട്ടി, എം.പി ഭാസ്‌കരന്‍,പങ്കെടുത്തു.