പെരുവള്ളൂര്‍: എസ്.എസ്.എല്‍.സി പരീക്ഷയില്‍ റാഷിദലിക്കും എല്ലാ വിഷയങ്ങളിലും എ പ്ലസ് ഉണ്ട്. അങ്ങനെ പറഞ്ഞാല്‍ പോര, മധ്യപ്രദേശുകാരനായ മിടുക്കന്‍ റാഷിദലിക്ക് പരീക്ഷയില്‍ എല്ലാ വിഷയങ്ങള്‍ക്കും എ പ്ലസാണ്!
കൊട്ടുകര പി.പി.എം.എച്ച്.എസ്.എസ് വിദ്യാര്‍ഥി റാഷിദലിയുടെ എ പ്ലസ് വിജയത്തിനു തിളക്കമേറെയാണ്. പെരുവള്ളൂരിലെ വാടക വീട്ടില്‍ താമസിച്ചുവരുന്ന മധ്യപ്രദേശിലെ ബേത്തൂര്‍ ജില്ലക്കാരായ കുര്‍ബാന്‍ അലി-സാജിദ ദമ്പതികളുടെ മകനാണ് റാഷിദലി. പഠനത്തിലും പാഠ്യാനുബന്ധ വിഷയങ്ങളിലും മിടുക്കികളായ ഇളയ രണ്ടു സഹോദരിമാരും റാഷിദലിക്കുണ്ട്. സബ്ജില്ല, ജില്ല, സംസ്ഥാനം, സ്‌കൂള്‍തല കലോത്സവങ്ങളില്‍ നിരവധി അവാര്‍ഡുകള്‍ ഇവര്‍ക്കു ലഭിച്ചിട്ടുണ്ട്.
മദ്‌റസയില്‍ ഏഴാം ക്ലാസില്‍നിന്നു സംസ്ഥാന പൊതുപരീക്ഷയില്‍ ആറാം റാങ്ക് നേടിയിട്ടുണ്ട് റാഷിദലി. പെരുവള്ളൂരിലെ വാടക വീട്ടിലാണ് ഈ നിര്‍ധന കുടുംബത്തിന്റെ താമസം. 2012ലാണ് കൂലിപ്പണിക്കാരനായ കുര്‍ബാനലിയുടെ കുടുംബം പെരുവള്ളൂരിലെ നടുക്കരയില്‍ എത്തുന്നത്. റാഷിദലി പെരുവള്ളൂര്‍ ഉങ്ങുങ്ങല്‍ സ്‌കൂളില്‍ നാലാം ക്ലാസില്‍ ചേര്‍ന്നാണ് ഇവിടെ പഠനം തുടങ്ങിയത്.