തിരുവനന്തപുരം: ജലചൂഷണം തടയുന്നതിന് വളരെക്കാലമായി കേടായ വാട്ടര്‍ മീറ്ററുകള്‍ മാറ്റിസ്ഥാപിക്കാത്ത ഉപഭോക്താക്കളുടെ കണക്ഷന്‍ വിച്ഛേദിക്കുമെന്ന് മന്ത്രി മാത്യു ടി തോമസ് നിയമസഭയെ അറിയിച്ചു. ഇതുസംബന്ധിച്ച് ഉപഭോക്താക്കള്‍ക്ക് നോട്ടിസ് നല്‍കി തുടര്‍നടപടികള്‍ സ്വീകരിച്ചുവരികയാണ്. സംസ്ഥാനത്തെ രൂക്ഷമായ വരള്‍ച്ചയുടെ പശ്ചാത്തലത്തില്‍ പ്രതിമാസം 50 കിലോ ലിറ്ററിന് മുകളില്‍ ഉപഭോഗം കണക്കാക്കുന്ന പുതിയ കണക്ഷനുകള്‍ നല്‍കുന്നതിന് താല്‍ക്കാലിക നിയന്ത്രണം ഏര്‍പ്പെടുത്തി. കൂടുതലായി ജലം ഉപയോഗിക്കുന്ന വ്യാവസായിക- വാണിജ്യ കണക്ഷനുകളിലെ ഉപഭോഗവും നിയന്ത്രിച്ചിട്ടുണ്ട്. നിയമവിരുദ്ധമായി ജലം ചോര്‍ത്തുന്നതും അനധികൃത ഉപയോഗവും കണ്ടുപിടിക്കുന്നതിന് ആന്റി വാട്ടര്‍ തെഫ്റ്റ് സ്‌ക്വാഡിന്റെ പ്രവര്‍ത്തനം ഉപയോഗപ്പെടുത്തി നിയമാനുസൃത നടപടി സ്വീകരിക്കുമെന്ന് മോന്‍സ് ജോസഫിന്റെ ശ്രദ്ധക്ഷണിക്കലിന് മറുപടിയായി മന്ത്രി അറിയിച്ചു.
വരള്‍ച്ച നേരിടുന്നതിനായി ജലനിധി രണ്ടാംഘട്ടത്തിലെ 166 പദ്ധതികള്‍ ഏപ്രില്‍ മാസത്തോടെ കമ്മിഷന്‍ ചെയ്യുന്നതോടെ 21,000 വീടുകളില്‍ കുടിവെള്ളമെത്തിക്കാന്‍ കഴിയും.
വൈദ്യുതി കണക്ഷന്‍ ലഭിക്കാത്തതുമൂലം വൈകുന്ന പദ്ധതികള്‍ക്ക് അടിയന്തരമായി കണക്ഷന്‍ ലഭ്യമാക്കി പദ്ധതി കമ്മിഷന്‍ ചെയ്യും. ഇതുവഴി ഏകദേശം 2,700 വീടുകളില്‍ കുടിവെള്ളം ലഭ്യമാക്കും. സ്രോതസ്സിന്റെയും ജലസംഭരണിയുടെയും പ്രവൃത്തികള്‍ പൂര്‍ത്തീകരിച്ചതും ജലവിതരണ പൈപ്പുകള്‍ സ്ഥാപിച്ചുവരുന്നതുമായ പദ്ധതികള്‍ക്ക് എത്രയുംവേഗം വൈദ്യുതി കണക്ഷന്‍ സ്ഥാപിച്ച് ഭാഗികമായെങ്കിലും ജലവിതരണം തുടങ്ങും.
ഇപ്രകാരം 100 പദ്ധതികളിലായി 5,500 കുടുംബങ്ങള്‍ക്ക് വരള്‍ച്ചാക്കാലത്ത് കുടിവെള്ളമെത്തിക്കാനാണ് തീരുമാനം. ചെക്കുഡാമുകള്‍ നിര്‍മിക്കുന്നതിനും കനാലുകള്‍, കുളങ്ങള്‍ എന്നിവ വൃത്തിയാക്കുന്നതിനുമാവശ്യമായ നടപടി സ്വീകരിക്കുമെന്നും മന്ത്രി കൂട്ടിച്ചേര്‍ത്തു.