തിരുവനന്തപുരം: കിഫ്ബി വഴി സര്‍ക്കാര്‍ വായ്പയെടുക്കുന്നത് നിരുത്തരവാദപരമായല്ലെന്ന് ധനമന്ത്രി ഡോ. തോമസ് ഐസക്. നിയമസഭയില്‍ ധനവിനിയോഗ ബില്ലിന്‍മേല്‍ നടന്ന ചര്‍ച്ചയ്ക്കു മറുപടി പറയുകയായിരുന്നു അദ്ദേഹം.
എടുക്കുന്ന വായ്പ തിരിച്ചടയ്ക്കാന്‍ നിയമസഭ അംഗീകരിച്ച വരുമാനം മാത്രം മതിയാകും. എടുക്കുന്ന വായ്പയുടെ കാലാവധിയുടെ അവസാന ഘട്ടമാകുമ്പോള്‍ തിരിച്ചടയ്‌ക്കേണ്ട തുകയിലധികം കൈവശം ബാക്കിയുണ്ടാകും. വികസനപ്രവര്‍ത്തനങ്ങള്‍ വായ്പയെടുത്ത് നടത്തുന്നതാണ് ലാഭകരം.
വായ്പയെടുക്കാതെ വികസനപ്രവര്‍ത്തനങ്ങള്‍ ദീര്‍ഘകാലത്തേക്ക് മാറ്റിവച്ചാല്‍ ഇപ്പോള്‍ വായ്പയെടുക്കുന്ന തുകയുടെയും പലിശയുടെയും ഒരുപാട് മടങ്ങ് തുക ചെലവാകും. വായ്പയിലും തിരിച്ചടവിലും എന്തെങ്കിലും പ്രശ്‌നങ്ങള്‍ വന്നാല്‍ അതു സഭയില്‍ ചര്‍ച്ച ചെയ്ത് പരിഹരിക്കാവുന്നതാണ്. ഇടതു സര്‍ക്കാരിന്റെ വികസന രീതി നീതി ആയോഗ് മാതൃകയിലല്ല. നെഹ്‌റുവിയന്‍ കാഴ്ചപ്പാട് അടിസ്ഥാനമാക്കിയുള്ളതാണ്. പ്രതിപക്ഷം അതിനെ പ്രശംസിച്ചില്ലെങ്കിലും പരിഹസിക്കരുതെന്നും മന്ത്രി പറഞ്ഞു. ചര്‍ച്ചക്കൊടുവില്‍ ധനവിനിയോഗ ബില്‍ വോട്ടിനിട്ട് പാസാക്കി.