കണ്ണൂര്‍: ലൈബ്രറി കൗണ്‍സില്‍ അന്താരാഷ്ട്ര പുസ്തകോത്സവവും ജില്ലാ ടൂറിസം പ്രമോഷന്‍ കൗണ്‍സിലിന്റെ സഹകരണത്തോടെ സാംസ്‌കാരികോത്സവവും 16ന് തുടങ്ങും.
കലക്ടറേറ്റ് മൈതാനിയില്‍ മേയര്‍ ഇ.പി ലത, ജില്ലാ പഞ്ചായത്ത് പ്രസിഡന്റ് കെ.വി സുമേഷ്, കലക്ടര്‍ മീര്‍ മുഹമ്മദലി എന്നിവര്‍ ചേര്‍ന്ന് ഉദ്ഘാടനം ചെയ്യും. വിവിധ ദിവസങ്ങളിലായി മന്ത്രിമാരായ കെ.കെ ശൈലജ, രാമചന്ദ്രന്‍ കടന്നപ്പള്ളി, എം.പിമാരായ പി.കെ ശ്രീമതി, കെ.കെ രാഗേഷ് മുന്‍ മന്ത്രി എം.എ ബേബി, എം.എല്‍.എമാര്‍, ഡോ. കെ.വി കുഞ്ഞികൃഷ്ണന്‍, അഡ്വ. പി അപ്പുക്കുട്ടന്‍, എഴുത്തുകാര്‍ പങ്കെടുക്കും.
സാംസ്‌കാരിക സമ്മേളനം,  പുസ്തക പ്രകാശനം, വനിതാ പാര്‍ലമെന്റ്, സെമിനാറുകള്‍, ഗാനമേള, നാടന്‍ കലാമേള, കലാഭവന്‍ മണി അനുസ്മരണം തുടങ്ങിയവ നടക്കും.
രാവിലെ 9 മുതല്‍ വൈകുന്നേരം എട്ട് വരെയാണ് മേള. 22ന് സമാപിക്കും. 23 മുതല്‍ 25 വരെ പ്രസ്‌ക്ലബ്, ഇന്‍ഫര്‍മേഷന്‍ വകുപ്പ് എന്നിവയുമായി ചേര്‍ന്നുള്ള അന്താരാഷ്ട്ര ചലച്ചിത്രോല്‍സവവും നടക്കും.