പുല്‍പ്പള്ളി: വേട്ടയാടിയ കേഴമാന്റെ ഇറച്ചിയുമായി ഒരാളെ വനംവകുപ്പ് പിടികൂടി. ചെതലയം പാതിരി സെക്ഷനിലെ ആലൂര്‍കുന്ന് കോളനിയിലെ സന്തോഷി(27)നെയാണ് വനംവകുപ്പ് തിങ്കളാഴ്ച പിടികൂടിയത്. ചെതലയം റെയിഞ്ചര്‍ ശ്രീകുമാറിന് ലഭിച്ച രഹസ്യ വിവിരത്തിന്റെ അടിസ്ഥാനത്തില്‍ കോളനിയില്‍ നടത്തിയ അന്വേഷണത്തിലാണ് ഇറച്ചിയുമായി സന്തോഷിനെ പിടികൂടിയത്. കോളനിയിലെ മൂന്ന് വീടുകളില്‍ നിന്നായി എട്ടര കിലോ കേഴമാന്റെ ഇറച്ചി ലഭിച്ചു. കൂടാതെ കത്തി, പാത്രങ്ങള്‍ എന്നിവയും കണ്ടെടുത്തു. സംഘത്തിലെ പ്രധാനിയടക്കം മൂന്നുപേരെ കൂടി പിടികൂടാനുണ്ട്. ഇവര്‍ക്കായി അന്വേഷണം ഊര്‍ജിതമാക്കി. വേട്ടനായ്ക്കളെ ഉപയോഗിച്ചാണ് കേഴമാനെ വേട്ടയാടിയതെന്ന് വനംവകുപ്പ് അധികൃതര്‍ പറഞ്ഞു. സെക്ഷന്‍ ഫോറസ്റ്റ് ഓഫീസര്‍ മുസ്തഫ സാദിഖ്, ബീറ്റ് ഫോറസറ്റ് ഓഫീസര്‍മാരായ കെ.ജി ഷാജന്‍, എസ് സുരേഷ് കുമാര്‍, സി.എസ് ബിനീഷ്, രാജേഷ് എന്നിവരുടെ നേതൃത്വത്തിലാണ് സന്തോഷിനെ പിടികൂടിയത്. ഇയാളെ പിന്നീട് കോടതിയില്‍ ഹാജരാക്കി.