നിലമ്പൂര്‍: മതേതരത്വത്തിനു മലപ്പുറമാണ് മാതൃകയെന്നു കൃഷി മന്ത്രി വി.എസ് സുനില്‍ കുമാര്‍. ഡിവിഷന്‍തല വിദ്യാര്‍ഥി സംഗമം 'കളിക്കൂട്ടം 2018' ഉദ്ഘാടനവും പഠനോപകരണ വിതരണവും വലപ്പുഴയില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം.
മലപ്പുറത്തിന്റെ മതേതര മുഖം ഗ്രാമങ്ങളിലൂടെ കാണാന്‍ കഴിയും. നാട്ടില്‍ ഒരാവശ്യം വരുമ്പോള്‍ ജാതി-മത ചിന്തകള്‍ക്കപ്പുറം അത് എല്ലാവരും ഏറ്റെടുത്ത് ഒറ്റക്കെട്ടായി പ്രവര്‍ത്തിക്കുകയെന്നതാണ് മലപ്പുറത്തിന്റെ പാരമ്പര്യം. പൊതുവിദ്യാലയങ്ങളിലെ വിദ്യാഭ്യാസം കൊണ്ടും ഇത്തരമൊരു മാതൃകയാണ് സര്‍ക്കാര്‍ ലക്ഷ്യമിടുന്നത്. പൊതുവിദ്യാഭ്യാസത്തിലൂടെ നാടിനെ തൊട്ടറിയുന്ന മനുഷ്യത്വമുള്ള ഒരു ജനതയെ വാര്‍ത്തെടുക്കാന്‍ കഴിയുമെന്നും ജാതിയോ മതമോ നോക്കാതെ സ്‌നേഹവും സാഹോദര്യവും ഊട്ടിയുറപ്പിക്കാനുള്ള മനസ് മലപ്പുറത്തുകാര്‍ക്കുണ്ടെന്നും അദ്ദേഹം പറഞ്ഞു.