പാറക്കടവ്: വെള്ളിയോടന്‍ എന്ന പേരില്‍ പ്രവാസ ലോകത്തു ശ്രദ്ധേയനായ എഴുത്തുകാരനും വാണിമേല്‍ സ്വദേശിയുമായ വെള്ളിയോടന്‍ സൈനുദ്ദീന്റെ കഥകള്‍ ഇനി തമിഴിലും.
തമിഴ് ലോകത്തെ പ്രമുഖ സാംസ്‌കാരിക പ്രവര്‍ത്തകരുടെയും എഴുത്തുകാരുടെയും സാന്നിധ്യത്തില്‍ നാഗര്‍കോവിലില്‍ നടന്ന ചടങ്ങിലാണ് സൈനുദ്ദീന്റെ 'കടല്‍ മരങ്ങള്‍' എന്ന ചെറുകഥാ സമാഹാരത്തിന്റെ തമിഴ് വിവര്‍ത്തനം പ്രകാശനം ചെയ്തത്. ആര്‍. മുത്തുമണി മൊഴിമാറ്റം നടത്തിയ കൃതി പ്രമുഖ തമിഴ് പ്രസാധകരായ ചങ്ക് പബ്ലിഷേഴ്‌സ് ആണ് പ്രസിദ്ധീകരിച്ചത്.
ആദ്യമായാണ് ഒരു ഇന്ത്യന്‍ ഭാഷയിലേക്കു വെള്ളിയോടന്റെ കൃതി ഭാഷാന്തരം ചെയ്യുന്നത്. വര്‍ഷങ്ങള്‍ മുന്‍പ് ഇംഗ്ലിഷിലേക്കു പരിഭാഷപ്പെടുത്തിയ 'ആയ' എന്ന കഥ ഈജിപ്ഷ്യന്‍ എഴുത്തുകാരന്‍ സക്കരിയ്യ അഹ്മദ് അറബി ഭാഷയിലേക്കും വിവര്‍ത്തനം ചെയ്തിരുന്നു.
അറബ് സാഹിത്യ ലോകത്ത് ഏറെ ശ്രദ്ധിക്കപ്പെട്ട  കഥയാണ് ആയ. അബൂദബി ശക്തി അവാര്‍ഡ്, ലോക മലയാളി കഥാ പുരസ്‌കാരം ഉള്‍പ്പെടെ നിരവധി പുരസ്‌കാരങ്ങള്‍ നേടിയ കൃതിയാണ് കടല്‍മരങ്ങള്‍. കവിജ്ഞര്‍ സ്വയം ഭൂലിംഗം, ജസ്റ്റിസ് കെ. അരുണാചലം, പ്രമുഖ വിവര്‍ത്തകന്‍  കുളച്ചല്‍ യൂസഫ്, സുധന്തിരവല്ലി ചടങ്ങില്‍ സംസാരിച്ചു.  
വാണിമേല്‍ വെള്ളിയോട് സ്വദേശിയായ സൈനുദ്ദീന്‍ ചേത്തക്കോട്ട് കുഞ്ഞബ്ദുല്ലയുടെയും ബിയ്യാത്തുവിന്റെയും മകനാണ്. സല്‍മയാണ് ഭാര്യ.