വെങ്ങപ്പള്ളി: വിവിധ ജാതി മതസ്ഥര്‍ക്കിടയില്‍ ജീവിക്കുന്ന വിശ്വാസികള്‍ക്ക് മാതൃകാ യോഗ്യനായ മതപണ്ഡിതനായിരുന്നു ശംസുല്‍ ഉലമാ ഇ.കെ അബൂബക്കര്‍ മുസ്‌ലിയാരെന്ന് സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞി മൗലവി.
തന്റെ വിശ്വാസ ആദര്‍ശങ്ങളില്‍ കണിശത കാണിക്കുമ്പോഴും ഇതര മത വിശ്വാസികളെ മാനിക്കാനും സഹിഷ്ണതയും സൗഹാര്‍ധവും സംരക്ഷിക്കാനും ശംസുല്‍ ഉലമ കാണിച്ച വിശാലമനസ്‌കത വര്‍ത്തമാനകാലത്ത് ഏറെ പ്രസക്തമാണെന്നും അദ്ധേഹം അഭിപ്രായപ്പെട്ടു.
വെങ്ങപ്പള്ളി ശംസുല്‍ ഉലമാ ഇസ്‌ലാമിക് അക്കാദമിയില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. യോഗത്തില്‍ ശിഹാബുദ്ധീന്‍ വാഫി കാവനൂര്‍ അധ്യക്ഷനായി. കോയ ഫൈസി, ഇബ്‌റാഹിം ഫൈസി ഉഗ്രപുരം, നൗഫല്‍ വാഫി, കുഞ്ഞിമുഹമ്മദ് ദാരിമി, അബൂബക്കര്‍ വാഫി, അഡ്വ. അബ്ദുറഹ്മാന്‍ സംബന്ധിച്ചു. ഇബ്‌റാഹിം ഫൈസി പേരാല്‍ സ്വാഗതവും എ.കെ സുലൈമാന്‍ മൗലവി നന്ദിയും പറഞ്ഞു.