കാസര്‍കോട്: കാസര്‍കോട് ജനറല്‍ ആശുപത്രിയിലെ ലിഫ്റ്റ് വീണ്ടും പണിമുടക്കിയത് രോഗികളെ ദുരിതത്തിലാക്കി. അഡ്മിറ്റ് ചെയ്യുന്ന രോഗികളെ ആശുപത്രിയിലെ മുകള്‍ നിലയിലേക്ക് ജീവനക്കാരും ബന്ധുക്കളും ചുമന്നു കൊണ്ട് പോകേണ്ട അവസ്ഥയിലായി. ആശുപത്രി പണിയുമ്പോള്‍ അധികൃതരുടെ ആസൂത്രണമില്ലായ്മ കാരണമായി കെട്ടിടത്തില്‍ റാമ്പ് സംവിധാനം സ്ഥാപിച്ചിരുന്നില്ല. ഇതേ തുടര്‍ന്നാണ് ഏഴു നിലയുള്ള ജനറല്‍ ആശുപത്രിയിലെ വിവിധ വാര്‍ഡുകളിലേക്കു രോഗികളെ ചുമന്നു കൊണ്ട് പോവുകയും തിരികെ കൊണ്ട് വരുകയും ചെയ്യുന്ന അവസ്ഥയുണ്ടായത്.
ആശുപത്രിയില്‍ സ്ഥാപിച്ച ലിഫ്റ്റ് ഇടയ്ക്കിടെ പണിമുടക്കുന്നത് രോഗികള്‍ക്കും കൂട്ടിരുപ്പകാര്‍ക്കും മാത്രമല്ല ആശുപത്രി ജീവനക്കാര്‍ക്കും ഡോക്ടര്‍മാര്‍ക്കും കടുത്ത പ്രയാസമാണ് സൃഷ്ടിക്കുന്നത്. അതെ സമയം ലിഫ്റ്റ് പണിമുടക്ക് തുടരുന്നതോടെ ബദല്‍ സംവിധാനം ഏര്‍പ്പെടുത്താന്‍ അധികൃതര്‍ തയ്യറായിട്ടില്ല.
ലിഫ്റ്റിന്റെ തകരാറു പരിഹരിക്കാന്‍ മികച്ച സാങ്കേതിക വിദ്യകള്‍ അറിയുന്ന ടെക്‌നീഷ്യന്മാരെ കിട്ടാതെ വരുന്നതിനെ തുടര്‍ന്നാണ് ലിഫ്റ്റ് ഇടയ്ക്കിടെ പണിമുടക്കുന്നതെന്നാണ് ആശുപത്രിയിലെത്തുന്ന രോഗികളും മറ്റും പറയുന്നത്. പണിമുടക്കുന്ന ലിഫ്റ്റിന് പുറമെ മറ്റൊരു ലിഫ്റ്റ് കൂടി ആശുപത്രിയില്‍ സ്ഥാപിക്കണമെന്ന ആവശ്യവും ജനങ്ങളില്‍ നിന്നും ഉയരുന്നുണ്ട്. എന്നാല്‍ ബഹുനിലകളില്‍ പ്രവര്‍ത്തിക്കുന്ന ആശുപത്രികളില്‍ റാമ്പില്ലാത്ത കേരളത്തിലെ ഏക ആശുപത്രിയെന്ന ഖ്യാതിയും കാസര്‍കോട് ജനറല്‍ ആശുപത്രിക്കു സ്വന്തമാണ്.