മുതുകുളം: കാറില്‍ വരികയിയിരുന്ന ചിങ്ങോലി ഗ്രാമപഞ്ചായത്ത് പ്രസിഡന്റിന്റെ സഹോദരനെ സി.പി.എം പ്രവര്‍ത്തകര്‍ മര്‍ദ്ദിച്ചതായി പരാതി. ചിങ്ങോലി ഗ്രാമപഞ്ചായത്ത് പ്രസിഡന്റ് എച്ച്. നിയാസിന്റെ സഹോദരന്‍ ചിങ്ങോലി കൊച്ചുവീട്ടില്‍ മുഹമ്മദ് റഷീദി (48) നാണ് മര്‍ദ്ദനമേറ്റത്.
ബുധനാഴ്ച വൈകിട്ട് ആറുമണിയോടെ വായനശാല ജംഗ്ഷന് വടക്ക് ഭാഗത്തുവെച്ചായിരുന്നു ആക്രമണം.
കായംകുളത്തെ സ്‌കൂളില്‍ പഠിക്കുന്ന മകനെ കൂട്ടികൊണ്ടുപോകാനായി ജംഗ്ഷനിലേക്ക് വരുമ്പോഴാണ് ആക്രമണം ഉണ്ടായത്. കാറും തല്ലിതകര്‍ത്തു. ചൊവ്വാഴ്ച രാത്രി സി.പി.എം പ്രവര്‍ത്തകനായ രാജ്കുമാറിനെ വീട്ടില്‍ കയറി വെട്ടിപരിക്കേല്‍പ്പിച്ചിരുന്നു. ഇതിനെതിരെ പ്രകടനവുമായി വന്നവര്‍ പ്രകോപനമില്ലാതെ ആക്രമിക്കുകയായിരുന്നുവെന്ന് മുഹമ്മദ് റഷീദ് പറഞ്ഞു.
പരുക്കേറ്റ മുഹമ്മദ് റഷീദ് ഹരിപ്പാട് ജില്ല ആശുപത്രിയില്‍ ചികിത്സയിലാണ്. എന്നാല്‍ പ്രകടനത്തിനിടയിലേയ്ക്ക് മുഹമ്മദ് റഷീദ് കാര്‍ ഓടിച്ചുകയറ്റുകയായിരുന്നുവെന്നാണ് സി.പി.എം നേതാക്കള്‍ പറഞ്ഞത്.