കൊണ്ടോട്ടി: കരിപ്പൂര്‍ വിമാനത്താവളം വഴി അനധികൃതമായി കടത്താന്‍ ശ്രമിച്ച 583 ഗ്രാം സ്വര്‍ണം എയര്‍ കസ്റ്റംസ് പിടികൂടി. കോഴിക്കോട് സ്വദേശി മുഹമ്മദ് ഷാഫിയില്‍(21) നിന്നാണ് സ്വര്‍ണം കണ്ടെത്തിയത്.
ബാഗേജിനുള്ളില്‍ സോളാര്‍ ടേബിള്‍ ലാംപിന്റെ ബാറ്ററിക്കുള്ളിലായിട്ടായിരുന്നു സ്വര്‍ണം ഒളിപ്പിച്ചിരുന്നത്. മൂന്ന് ലാംപുകള്‍ക്കുള്ളിലായി ആറ് സ്വര്‍ണക്കട്ടികളായിരുന്നു ഉണ്ടായിരുന്നത്. ദുബൈയില്‍ നിന്നുള്ള എയര്‍ഇന്ത്യ എക്‌സ്പ്രസ് വിമാനത്തിലാണ് ഇയാള്‍ കരിപ്പൂരിലെത്തിയത്. പിടികൂടിയ സ്വര്‍ണത്തിന് 18.01 ലക്ഷം രൂപ വില വരും.