കൊണ്ടോട്ടി: കുത്തിവെപ്പെടുത്താല്‍ കുട്ടികള്‍ക്കു ഭാവിയില്‍ മക്കളുണ്ടാവില്ലെ സാറെ!.  പുളിക്കല്‍ എ.എം.എം എച്ച് സ്‌കൂളില്‍ കുത്തിവെപ്പു ബോധവത്കരണ ക്ലാസില്‍ ഉയര്‍ന്ന ചോദ്യം കേട്ട് ആരോഗ്യവകുപ്പ് ഉദ്യോഗസ്ഥര്‍ ഞെട്ടി. അങ്ങിനെ ഒരു തകരാറുമില്ല. ഇത്തരം മൂഢമായ ചിന്താഗതിയും തീരുമാനങ്ങളും കൈകൊള്ളുന്നതാണു നിങ്ങളുടെ മക്കളുടെ ജീവന്‍ നഷ്ടപ്പെടുത്തുന്നത്. ലോകത്ത് ഒരു പ്രശ്‌നങ്ങളുമില്ലാതെ കോടിക്കണക്കിനു കുഞ്ഞുങ്ങളാണു ദിനേന കുത്തിവെപ്പ് എടുക്കുന്നതെന്നും  ആരും വൈമുഖ്യം കാണിക്കരുതെന്നും ആരോഗ്യവകുപ്പ്  ഉദ്യോഗസ്ഥര്‍ ബോധവത്കരണ ക്ലാസില്‍ വിശദീകരിച്ചു. പിറന്ന നാള്‍ തൊട്ട് അഞ്ചുവയസുവരെ അഞ്ചുതവണയായി നല്‍കുന്ന കുത്തിവെപ്പിനോടു വൈമുഖ്യം കാണിക്കുന്നതാണു ഡിഫ്തീരിയ പോലുള്ള രോഗങ്ങള്‍ വീണ്ടും തലപൊക്കാന്‍ കാരണം. ഡിഫ്തീരിയ, ടെറ്റ്‌നസ്, വില്ലന്‍ചുമ എന്നിവക്കെതിരെയുളള കുത്തിവെപ്പാണ് അഞ്ചു തവണയായി നല്‍കുന്നത്. കുഞ്ഞുങ്ങള്‍ക്ക് ഒന്നര മാസം, രണ്ടര മാസം, മൂന്നര മാസം, ഒന്നര വയസ്, അഞ്ചു വയസ് എന്നീ പ്രായത്തിലാണു കുത്തിവെപ്പു നല്‍കുന്നത്. ഇതു പൂര്‍ണമായും എടുക്കാത്ത കുട്ടികളില്‍ ഏഴുവയസില്‍ മൂന്നു തവണ ടി.ഡി വാക്‌സിന്‍ നല്‍കിയാലും രോഗം പ്രതിരോധിക്കാനാകുമെന്ന് ആരോഗ്യവകുപ്പു പറയുന്നു. ഇന്ത്യയില്‍ തന്നെ അത്യപൂര്‍വമായി കാണപ്പെടുന്ന രോഗം മലപ്പുറം ജില്ലയില്‍ കാണുന്നതിനു കാരണം പ്രതിരോധ കുത്തിവെപ്പിനോടുളള വൈമുഖ്യമാണെന്നും ആരോഗ്യ വകുപ്പു പറയുന്നു.10 രോഗികളില്‍ ഒരാള്‍ മരിക്കുമെന്നാണ് ആരോഗ്യവകുപ്പിന്റെ സ്ഥീരീകരണം.