മാഡ്രിഡ്: പരുക്കും ഫോമില്ലായ്മയും മറികടന്ന് മികവിലേക്ക് തിരിച്ചെത്താന്‍ ശ്രമിക്കുന്ന മുന്‍ ലോക ഒന്നാം നമ്പര്‍ താരം സെര്‍ബിയയുടെ നൊവാക് ദ്യോക്കോവിചിന് മാഡ്രിഡ് ഓപണിലെ ആദ്യ റൗണ്ടില്‍ വിജയം. കരുത്തനായ എതിരാളി ജപ്പാന്റെ കെയ് നിഷികോരിയെ കീഴടക്കിയാണ് ദ്യക്കോവിച് രണ്ടാം റൗണ്ടിലേക്ക് കടന്നത്. 12 തവണ ഗ്രാന്‍ഡ് സ്ലാം കിരീടം സ്വന്തമാക്കിയ ദ്യോക്കോ രണ്ടാം റൗണ്ടില്‍ കെയ്ല്‍ എഡ്മുണ്ടുമായി ഏറ്റുമുട്ടും. നിഷികോരിയെ നേരിട്ടുള്ള സെറ്റുകള്‍ക്ക് 7-5, 6-4 എന്ന സ്‌കോറിനാണ് ദ്യോക്കോവിച് മറികടന്നത്.