ഇരിങ്ങാലക്കുട: ക്രൈസ്റ്റ് കോളജിനു മുന്നില്‍ കോണ്‍ഗ്രസ്സ് ഇരിങ്ങാലക്കുട ടൗണ്‍ മണ്ഡലം പ്രസിഡന്റ് ജോസഫ് ചാക്കോ, കെ.എസ്.യു മുന്‍ മുകുന്ദപുരം താലൂക്ക് പ്രസിഡന്റ് സനല്‍ വര്‍ഗ്ഗീസ്, കെ.എസ്.യു യൂനിറ്റ് ഭാരവാഹികളായ മുഹമ്മദ് ഫയസ്, ടോം എന്നിവരെ  എസ്.എഫ്.ഐ പ്രവര്‍ത്തകര്‍ മര്‍ദ്ദിച്ചുവെന്ന് പരാതി.  ഇന്നലെ രാവിലെ നടക്കുവാന്‍ ഇറങ്ങിയ ജോസഫ് ചാക്കോയും സനല്‍ വര്‍ഗ്ഗീസും കെഎസ്‌യുവിന്റെ കൊടിമരം മറിഞ്ഞ് കിടക്കുന്നത് കണ്ട് ക്രൈസ്റ്റ് കോളജിലെ കെഎസ്‌യു നേതാക്കളുടെ അരികിലേക്ക് ചെന്ന് സംസാരിച്ചുകൊണ്ടിരിക്കുമ്പോഴാണ് അമ്പതോളം വരുന്ന എസ്എഫ്‌ഐക്കാര്‍ മാരകായുധങ്ങളുമായി വന്ന് ക്രൂരമായി മര്‍ദ്ദിച്ചത്.
 ക്രിക്കറ്റ് ബാറ്റ്, ഇടിക്കട്ട, സ്‌ക്രൂഡ്രൈവര്‍, തുടങ്ങിയവ ഉപയോഗിച്ചായിരുന്നു മര്‍ദ്ദനം. മണ്ഡലം പ്രസിഡന്റ് ജോസഫ് ചാക്കോക്ക് നെറ്റിയില്‍ കുത്തേറ്റു.  സനല്‍ വര്‍ഗ്ഗീസിന് നെറ്റിയിലും കൈക്കും കുത്തേറ്റിട്ടുണ്ട്.
ഗുരുതരമായി പരിക്കേറ്റ ജോസഫ് ചാക്കോ, സനല്‍ വര്‍ഗ്ഗീസ് എന്നിവരെ ഇരിങ്ങാലക്കുട താലൂക്ക് ആശുപത്രിയില്‍ പ്രവേശിപ്പിച്ചു. മര്‍ദ്ദനത്തില്‍ പരിക്കേറ്റ ക്രൈസ്റ്റ് കോളേജ് കെ.എസ്.യു നേതാക്കളായ മുഹമ്മദ് ഫയസ്, ടോം എന്നിവരെ ഇരിങ്ങാലക്കുട സഹകരണ ആശുപത്രിയിലും പ്രവേശിപ്പിച്ചു.