കൊടുങ്ങല്ലൂര്‍: ക്ഷേത്ര ദര്‍ശനത്തിന് പോവുകയായിരുന്ന വീട്ടമ്മയെ ബൈക്കിലെത്തിയ രണ്ടുപേര്‍ ചേര്‍ന്ന് തള്ളി വീഴ്ത്തി രണ്ടര പവന്റെ താലിമാല പൊട്ടിച്ചെടുത്തു. വീഴ്ചക്കിടയില്‍ പരിക്കേറ്റ വീട്ടമ്മയെ ആശുപത്രിയില്‍ പ്രവേശിപ്പിച്ചു.
  പടിഞ്ഞാറേ വെമ്പല്ലൂര്‍ കരോളില്‍ സത്യന്റെ ഭാര്യ പ്രസന്ന (46)യുടെ മാലയാണ് പൊട്ടിച്ചെടുത്തത്. കൈകള്‍ക്ക് പരിക്കേറ്റ ഇവര്‍ മോഡേണ്‍ ആശുപത്രിയില്‍ ചികിത്സയിലാണ്. ഇന്നലെ രാവിലെ എട്ടരയോടെ പടിഞ്ഞാറെ വെമ്പല്ലൂര്‍ ദുബായ് റോഡില്‍ വെച്ചാണ് സംഭവം. ബസ് സ്‌റ്റോപ്പിലേക്ക് നടന്നുവരികയായിരുന്ന ഇവരെ പിന്‍തുടര്‍ന്ന് വന്ന ബൈക്ക് യാത്രക്കാര്‍ ആളൊഴിഞ്ഞ ഭാഗത്തുവെച്ച് ബൈക്ക് വട്ടം നിര്‍ത്തി തള്ളി വീഴ്ത്തുകയായിരുന്നു. താഴെ വീണ ഇവരുടെ കഴുത്തില്‍ നിന്നും പിന്നിലിരുന്നയാള്‍ ചാടിയിറങ്ങി മാല പൊട്ടിച്ചെടുക്കുകയായിരുന്നു.