നെയ്യാറ്റിന്‍കര: റെയില്‍വേ സ്റ്റേഷനില്‍ നിര്‍ത്തിയിട്ട ഗുഡ്‌സ് ട്രെയിനില്‍നിന്ന് ഇന്ധനചോര്‍ച്ച. തിരുനെല്‍വേലിയിലേയ്ക്ക് പെട്രോള്‍ കൊണ്ടുപോയ ഗുഡ്‌സ് ട്രൈയിനിന്റെ ഒരു ടാങ്കിന്റെ വാല്‍വുവഴിയാണ് പെട്രോള്‍ ചീറ്റി കൊണ്ടിരുന്നത്. യാത്രക്കാരാണ് ഇത് ആദ്യം കണ്ടത്.
ഇത് വന്‍ ദുരന്തത്തിന് ഇടയാക്കുന്നതായിട്ടും അധികൃതര്‍ നിസാരവല്‍കരിക്കുകയായിരുന്നു. വിവരം അറിഞ്ഞ ഉടന്‍ തന്നെ സ്റ്റേഷന്‍ മാസ്റ്റര്‍ വിവരം ലോക്കോ പൈലറ്റിനെ അറിയിച്ചു. തുടര്‍ന്ന് റെയില്‍വേ ടെക്‌നിക്കല്‍ വിഭാഗത്തിനെ വിവരം അറിയിച്ചതായിട്ടാണ് അധികൃതര്‍ പറഞ്ഞത്.ഇന്ധനം കൊണ്ടുവരുന്ന വാഹനം അധികൃതര്‍ സമയബന്ധിതമായി പരിശോധിക്കാത്തതാണ് വന്‍ വീഴ്ചയ്ക്ക് കാരണം.
ഷോര്‍ട്ട് സര്‍ക്യൂട്ട് ഉണ്ടായാല്‍ ഒരു ഗ്രാമം മൊത്തം നശിക്കുവാന്‍ ഇത്തരത്തിലുളള വീഴ്ച ഇടയാകും.
മുന്‍പും പല തവണ ഇത്തരത്തില്‍ ഇന്ധന ചോര്‍ച്ചയോടെ ഗുഡ്‌സ് ട്രെയിന്‍ ഇത് വഴി കടന്നു പോയിട്ടുണ്ടെന്നു നാട്ടുകാര്‍ പറഞ്ഞു.