കൊട്ടാരക്കര: എം.സി റോഡില്‍ മുട്ടമ്പലം റയില്‍വേ മേല്‍പാലത്തിന് സമീപം അപകടം പതിയിരിക്കുന്ന മേഖലയായി തീര്‍ന്നിരിക്കുന്നു. ഒരു മാസത്തിനകം 12 വാഹനങ്ങള്‍ ഇവിടെ അപകടത്തില്‍ പെടുകയും മൂന്നുപേര്‍ക്ക് ജീവന്‍ നഷ്ടപ്പെടുകയും ചെയ്തു. കൊട്ടാരക്കര പുലമണ്‍ ജങ്ഷന് ഒന്നര കിലോമീറ്റര്‍ അകലെയാണ് മുട്ടമ്പലം ജങ്ഷന്‍. റെയില്‍വേ ലൈനിന്റെ നവീകരണത്തിന്റെ ഭാഗമായി മുട്ടമ്പലം ഭാഗത്ത് റയില്‍വേ മേല്‍പ്പാലം പുതുക്കി പണിതിരുന്നു. അശാസ്ത്രീയമായ രീതിയിലാണ് മേല്‍പാലം രൂപകല്‍പ്പന ചെയ്തതെന്ന് അന്നേ ആരോപണം ഉയര്‍ന്നിരുന്നു. പഴയ എം.സി.റോഡിന് സമീപത്തുകൂടി വളച്ചാണ് പാലം നിര്‍മിച്ചിരിക്കുന്നത്. ഇതുമൂലം തിരുവന്തപുരം ഭാഗത്തുനിന്നു കോട്ടയം ഭാഗത്തേക്ക് പോകുന്ന വാഹനങ്ങളാണ് അധികവും ഈ ഭാഗത്ത് അപകടത്തില്‍ പെടുന്നത്.
അശാസ്ത്രീയമായ രീതിയിലുള്ള റെയില്‍വേ മേല്‍പ്പാലം നിര്‍മാണവും  കുന്നങ്കര പമ്പിന്റെ ഭാഗം മുതല്‍ കലയപുരം ഭാഗം  വരെ വഴിവിളക്കില്ലാത്തതുമാണ് അപകടങ്ങള്‍ക്കു കാരണമെന്നാണ് നാട്ടുകാര്‍ ചൂണ്ടിക്കാട്ടുന്നത്. കെ.എസ്.ടി.പിയുടെ  അധീനതയിലുള്ള എം.സി റോഡില്‍ ഇരുവശത്തും വഴിവിളക്കുകള്‍ ഉണ്ട്. എന്നാല്‍ കഴിഞ്ഞ ആറുമാസക്കാലമായി ഈ മേഖലകളില്‍ വഴിവിളക്കുകള്‍ കത്തുന്നില്ല. പാലത്തിന്  സമീപം ഹൈമാസ്‌ക് ലൈറ്റ് സ്ഥാപിക്കണമെന്ന ആവശ്യം ഉയര്‍ന്നിട്ട് വര്‍ഷങ്ങളാകുന്നു. എം.എല്‍.എയും എം.പിയും ഇക്കാര്യം പരിഗണിക്കുന്നില്ലെന്നാണ് നാട്ടുകാര്‍ പറയുന്നത്.
അപകട സാധ്യതയുള്ള ഇവിടെ സിഗ്നല്‍ ലൈറ്റുകളോ മുന്നറിയിപ്പ് ബോര്‍ഡുകളോ ഇല്ല. കോട്ടയം ഭാഗത്തു നിന്നും ഇറക്കം ഇറങ്ങി വരുന്ന വാഹനങ്ങള്‍ കൊട്ടാരക്കര ഭാഗത്തു നിന്നും വരുന്ന വാഹനങ്ങള്‍ മറികടക്കുവാന്‍ ശ്രമിക്കുമ്പോഴാണ് അപകടങ്ങള്‍ അധികവും ഉണ്ടാകുന്നത്.  പാലത്തിന് സമീപമുള്ളപഴയ എം.സി റോഡിലേക്ക് തിരുവനന്തപുരം ഭാഗത്തുനിന്നും വരുന്ന വാഹനങ്ങള്‍ തെറ്റി കയറുന്നതും അപകടത്തിന് കാരണമാകുന്നുണ്ട്. കഴിഞ്ഞ ദിവസം തിരുവനന്തപുരം എയര്‍പോര്‍ട്ടില്‍ നിന്നും യാത്രക്കാരുമായി വന്ന ഇന്നോവകാര്‍  രാത്രി പത്തരയോടെ  ഇവിടെ അപകടത്തില്‍പ്പെട്ട് സമീപത്തെ കുഴിയിലേക്ക്  മറിഞ്ഞിരുന്നു. നിസാരപരിക്കുകളോടെ  യാത്രക്കാര്‍ രക്ഷപ്പെട്ടു. തിരുവനന്തപുരം ഭാഗത്തു നിന്നു വരുന്ന വാഹനങ്ങളുടെ ഡ്രൈവര്‍മാര്‍ക്ക് വെളിച്ചകുറവുള്ളതിനാല്‍ കൃത്യമായി പാലത്തിലേക്കുള്ള റോഡ് കാണാന്‍ സാധിക്കുകയില്ലെന്നാണ് അപകടത്തില്‍പ്പെടുന്ന വാഹനങ്ങളുടെ ഡ്രൈവര്‍മാര്‍ പറയുന്നത്. സ്ഥിരമായി അപകടം നടക്കുന്ന മേഖലയായിരുന്നതിനാല്‍ എം.സി റോഡിന് സമീപമുള്ള വീട്ടുകാര്‍ ഭീതിയോടെയാണ് അന്തിയുറങ്ങുന്നത്.
കഴിഞ്ഞ ആഴ്ച ഇ.എസ് ബിജിമോള്‍ എം.എല്‍.എയുടെ കാര്‍ ഇവിടെ അപകടത്തില്‍ പെട്ടിരുന്നു. തൊട്ടുമുന്‍ ദിവസം തടി കയറ്റി വന്ന ലോറി മറിഞ്ഞ് മൂന്നു മണിക്കൂറാണ്  ഗതാഗത തടസമുണ്ടായത്. പാലത്തിന് സമീപത്തെ പള്ളിയിലേക്കു വരുന്നവര്‍ക്കും സമീപത്തെ സ്‌കൂളുകളിലേക്കും വരുന്ന വിദ്യാര്‍ഥികള്‍ക്കും ഭീഷണിയായി മാറിയിരിക്കുകയാണ് മുട്ടമ്പലം ജങ്ഷനിലെ അപകടമേഖല. അപകടത്തെകുറിച്ചുള്ള പരാതി സ്ഥിരമായി അധികൃതരെ അറിയിക്കുന്നുണ്ടെങ്കിലും നടപടികള്‍ ഉണ്ടാകുന്നില്ലെന്ന് ജനപ്രതിനിധികളും നാട്ടുകാരും പറയുന്നു.