ന്യൂഡല്‍ഹി: മുസ്‌ലിം ലീഗ് ദേശീയ സെക്രട്ടറിയേറ്റ് യോഗവും മുന്‍ അധ്യക്ഷന്‍ ഇ. അഹമ്മദ് അനുസ്മരണവും നാളെ ഡല്‍ഹിയില്‍ നടക്കും. ഉപരാഷ്ട്രപതി ഡോ. ഹാമിദ് അന്‍സാരി, കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി, കേരളത്തില്‍നിന്നുള്ള എം.പിമാര്‍, മുസ്‌ലിം ലീഗ് ദേശീയ നേതാക്കള്‍ പങ്കെടുക്കും.
പി.കെ കുഞ്ഞാലിക്കുട്ടി ജനറല്‍ സെക്രട്ടറിയായി തെരഞ്ഞെടുക്കപ്പെട്ട ശേഷം ഡല്‍ഹിയില്‍ നടക്കുന്ന ആദ്യ മുസ്‌ലിം ലീഗ് ദേശീയ സെക്രട്ടറിയേറ്റ് യോഗത്തിന്റെ മുഖ്യ അജന്‍ഡ കേരളത്തിനു പുറത്തേക്ക് സംഘടനയെ വ്യാപിപ്പിക്കുകയാണ്. എം.എസ്.എഫ് അഖിലേന്ത്യാ ഭാരവാഹികളുടെ യോഗവും ഇന്ന് നടക്കുന്നുണ്ട്. ഡല്‍ഹിയിലെ എമറാള്‍ഡ് ഹോട്ടലില്‍ രാവിലെയാണ് എം.എസ്.എഫിന്റെ ദേശീയ നിര്‍വാഹക സമിതി യോഗം നടക്കുന്നത്. ജെ.എന്‍.യു വിദ്യാര്‍ഥികളായ നജീബ് അഹമ്മദിന്റെ തിരോധനവും മുത്തുകൃഷ്ണന്റെ ആത്മഹത്യയും സി.ബി.ഐ അന്വേഷിക്കണമെന്ന് ആവശ്യപ്പെട്ട് എം.എസ്.എഫ് നാളെ പാര്‍ലമെന്റ് മാര്‍ച്ചും സംഘടിപ്പിക്കുന്നുണ്ട്.