കുമ്പള: ജില്ലയില്‍ ഇടക്കിടെയുണ്ടാകുന്ന അപ്രഖ്യാപിത വൈദ്യുതി മുടക്കത്തിനെതിരേ പ്രതിഷേധം ശക്തം. കുമ്പള ഇലക്ട്രിക്കല്‍ സെക്ഷന് കീഴിലാണ് പകല്‍ സമയങ്ങളില്‍ മുഴുവനായുള്ള വൈദ്യുതി മുടക്കം തുടര്‍ക്കഥയാകുന്നത്. അതേസമയം അറ്റകുറ്റ പ്രവൃത്തികള്‍ നടക്കുന്നതിനാലാണ് വൈദ്യുതി മുടക്കം ഉണ്ടാകുന്നതെന്നാണ് അധികൃതരുടെ ഭാഷ്യം. എന്നാല്‍ ഇത്തരം അറ്റകുറ്റപ്പണികള്‍ക്ക് വേണ്ടി വൈദ്യുതി വിതരണം നിര്‍ത്തിവയ്ക്കുമ്പോള്‍ മുന്‍കൂട്ടിയുള്ള അറിയിപ്പുകളൊന്നും ഉണ്ടാകുന്നില്ല. നേരത്തെ അറിയിപ്പുകള്‍ രണ്ട് ദിവസം മുന്‍പ് തന്നെ പൊതുജനങ്ങള്‍ക്ക് നല്‍കുമായിരുന്നു. ഇപ്പോള്‍ യാതൊരു മുന്നറിയിപ്പുമില്ലാതെയാണ് ഇപ്പോള്‍ വൈദ്യുതി മുടക്കുന്നത്.
കളത്തൂര്‍, ഉളുവാര്‍, കൊടിയമ്മ, ബംബ്രാണ, കളത്തൂര്‍ എന്നീ പ്രദേശങ്ങളിലെ ഒറ്റപ്പെട്ട ചിലയിടങ്ങളില്‍ വൈദ്യുതി നിലച്ചാല്‍ പലപ്പോഴും രണ്ടോ മൂന്നോ ദിവസങ്ങള്‍ക്ക് ശേഷമാണ് ഇത് പരിഹരിക്കുന്നത്. ഈ പ്രദേശങ്ങളിലെ വൈദ്യുതി ലൈനുകള്‍ കൂടുതലായും കടന്നുപോകുന്നത് തെങ്ങ്, കവുങ്ങ് തോട്ടങ്ങള്‍ക്കിടയിലൂടെയാണ്. ചെറിയൊരു കാറ്റടിച്ചാല്‍ കവുങ്ങുകള്‍ മറിഞ്ഞ് വൈദ്യുതത്തൂണുകള്‍ തകരുന്നതുള്‍പ്പെടെയുള്ള സംഭവങ്ങളും പതിവാണ്.
അതേസമയം തുടര്‍ച്ചയായുള്ള വൈദ്യുതി മുടക്കം കുമ്പള സെക്ഷന് കീഴിലെ നിരവധി വ്യവസായ സ്ഥാപനങ്ങളെ കാര്യമായി ബാധിക്കുന്നുണ്ട്. കൂടാതെ നിര്‍മാണ മേഖലകളും പ്രതിസന്ധിയിലായിരിക്കുകയാണ്. കുമ്പള സെക്ഷന്‍ ഓഫിസ് വിഭജിച്ച് പെര്‍ളയിലും സീതാംഗോളിയിലും പുതിയസെക്ഷന്‍ അനുവദിച്ചിട്ടും കുമ്പളയിലെ വൈദ്യുതി പ്രതിസന്ധിക്ക് പരിഹാരമുണ്ടാക്കാന്‍ ഇതുവരെയും സാധിച്ചിട്ടില്ല. അതേസമയം ഇടക്കിടെയുണ്ടാകുന്ന അപ്രഖ്യാപിത വൈദ്യുതമുടക്കത്തില്‍ പരിഹാരം വേണമെന്നാവശ്യപ്പെട്ട് സമരങ്ങള്‍ക്ക് തുടക്കം കുറിക്കാനൊരുങ്ങുകയാണ് നാട്ടുകാര്‍.
അതേസമയം കാസര്‍കോട് നഗരത്തിലും വൈദ്യുത മുടക്കം പതിവായിരിക്കുകയാണ്. പകല്‍ സമയങ്ങളിലും രാത്രിയിലും മണിക്കൂറുകളോളമാണ് വൈദ്യുതി ബന്ധം വിച്ഛേദിക്കുന്നത്. ഇതുമൂലം വ്യാപാര സ്ഥാപനങ്ങളുടെ ഉടമകളും പൊതുജനവുമാണ് ഏറെ ദുരിതത്തിലാവുന്നത്. പകല്‍ സമയങ്ങളില്‍ പലപ്പോഴും മണിക്കൂറുകളോളമാണ് വൈദ്യുതി മുടങ്ങുന്നത്. ഇന്നലെ പുലര്‍ച്ചെ കാസര്‍കോട് നഗരത്തില്‍ നിലച്ച വൈദ്യുതി ബന്ധം പുനഃസ്ഥാപിച്ചത് ഉച്ചയ്ക്ക് ഒരു മണിയോടെയാണ്.