മാഡ്രിഡ്: യുവേഫ ചാംപ്യന്‍സ് ലീഗ് പ്രീ ക്വാര്‍ട്ടര്‍ രണ്ടാം പാദ പോരാട്ടത്തില്‍ ഇന്നു സ്പാനിഷ് കരുത്തരായ അത്‌ലറ്റിക്കോ മാഡ്രിഡ് ജര്‍മന്‍ ടീം ബയര്‍ ലെവര്‍കൂസനുമായും ഫ്രഞ്ച് ടീം മൊണാക്കോ ഇംഗ്ലീഷ് കരുത്തരായ മാഞ്ചസ്റ്റര്‍ സിറ്റിയുമായും കൊമ്പുകോര്‍ക്കും.
ആദ്യ പാദത്തിലെ എവേ പോരാട്ടത്തില്‍ 4-2ന്റെ തകര്‍പ്പന്‍ ജയം സ്വന്തമാക്കിയാണു അത്‌ലറ്റിക്കോ മാഡ്രിഡ് സ്വന്തം തട്ടകത്തില്‍ കളിക്കാനിറങ്ങുന്നത്. ഏറെക്കുറെ ക്വാര്‍ട്ടര്‍ ബര്‍ത്ത് ഉറപ്പിച്ചാണു സിമിയോണി ടീമിനെ കളത്തിലിറക്കുന്നത്.
അതേസമയം ഇംഗ്ലീഷ് കരുത്തരായ മാഞ്ചസ്റ്റര്‍ സിറ്റി സങ്കീര്‍ണമായ അവസ്ഥയിലാണു ഇന്നു എവേ പോരാട്ടത്തില്‍ ഫ്രഞ്ച് ലീഗ് വണില്‍ ഒന്നാം സ്ഥാനത്തു കുതിക്കുന്ന മൊണാക്കോയെ നേരിടാനിറങ്ങുന്നത്. ആദ്യ പാദത്തില്‍ 5-3നു വിജയിക്കാന്‍ സിറ്റിക്ക് സാധിച്ചെങ്കിലും സ്വന്തം മണ്ണില്‍ എതിരാളികള്‍ക്കു മൂന്നു ഗോളുകള്‍ അടിക്കാന്‍ അവസരം കൊടുത്തത് അവര്‍ക്ക് തിരിച്ചടിയായി മാറാനും ഇട നല്‍കുന്നു. മൂന്നു എവേ ഗോളിന്റെ ആത്മവിശ്വാസത്തില്‍ സ്വന്തം തട്ടകത്തില്‍ കളിക്കാനിറങ്ങുന്നതിന്റെ ആനുകൂല്യം പരമാവധി മുതലെടുക്കാനുള്ള ശ്രമത്തിലായിരിക്കും മൊണാക്കോ. നിലവില്‍ ഫ്രഞ്ച് ലീഗ് വണില്‍ മികച്ച ഫോമില്‍ നില്‍ക്കുന്ന ടീമാണു അവര്‍.