അരീക്കോട്: ക്വാറികള്‍ക്കു കൂട്ടത്തോടെ അനുമതി നല്‍കിയ സി.പി.എം നിയന്ത്രണത്തിലുള്ള ഊര്‍ങ്ങാട്ടിരി പഞ്ചായത്ത് ഭരണസമിതിയുടെ നീക്കത്തില്‍ പ്രതിഷേധിച്ചു നേരത്തെ നിശ്ചയിച്ചിരുന്ന ശാസ്ത്ര സാഹിത്യ പരിഷത്തിന്റെ ജില്ലാ സമ്മേളനം ഊര്‍ങ്ങാട്ടിരിയില്‍നിന്നു കിഴുപറമ്പ് പഞ്ചായത്തിലേക്കു മാറ്റാനുള്ള തീരുമാനത്തെ ഊര്‍ങ്ങാട്ടിരി പഞ്ചായത്ത് മുസ്‌ലിംലീഗ് കമ്മിറ്റി സ്വാഗതം ചെയ്തു.
പാരിസ്ഥിതിക പ്രശ്‌നങ്ങള്‍ സൃഷ്ടിച്ചു ജനങ്ങള്‍ക്കു പ്രയാസമുണ്ടണ്ടാക്കുന്ന തരത്തില്‍ ക്വാറികള്‍ക്ക് അനുമതി നല്‍കിയ ഭരണസമിതിയുടെ നീക്കത്തെ ചോദ്യംചെയ്തതിന്റെ പേരില്‍ സി.പി.ഐ അംഗമായ വൈസ് പ്രസിഡന്റിന്റെ മേശയും കസേരയും വലിച്ചെറിഞ്ഞ നടപടി നീതീകരിക്കാനാവില്ല. ഈ വിഷയത്തില്‍ സി.പി.ഐ നേതൃത്വം മൗനം വെടിയണമെന്നും ലീഗ് ആവശ്യപ്പെട്ടു.
കെ. അസീസ് മാസ്റ്റര്‍ ഉദ്ഘാടനം ചെയ്തു. സി.ടി അബ്ദുര്‍റഹിമാന്‍ അധ്യക്ഷനായി. എന്‍.കെ യൂസുഫ് മാസ്റ്റര്‍, വി.ടി അബ്ദുര്‍റഹിമാന്‍, അല്‍മോയ റസാഖ്, യു. ഉണ്ണി മുഹമ്മദ്, പി.കെ അബ്ദുര്‍റഹിമാന്‍, ടി. ഇസ്മാഈല്‍ സംബന്ധിച്ചു.