നെടുമ്പാശ്ശേരി: അന്താരാഷ്ട്ര വിമാനത്താവളത്തില്‍ കഴിഞ്ഞ രണ്ട് ദിവസങ്ങളില്‍ കസ്റ്റംസ് എയര്‍ ഇന്റലിജന്‍സ് വിഭാഗം നടത്തിയ പരിശോധനയില്‍ 24.1 ലക്ഷം രൂപയുടെ സ്വര്‍ണം പിടിച്ചെടുത്തു. വിദേശത്ത് നിന്നെത്തിയ നാല് യാത്രക്കാരില്‍ നിന്നായാണ് 751 ഗ്രാം തൂക്കം വരുന്ന സ്വര്‍ണം പിടികൂടിയത്. ദുബൈയില്‍ നിന്നുമെത്തിയ തൃശൂര്‍ സ്വദേശിയില്‍ നിന്നും 3.17 ലക്ഷം രൂപ വിലവരുന്ന 100 ഗ്രാം സ്വര്‍ണ മാലയും ദോഹയില്‍ നിന്നുമെത്തിയ കോഴിക്കോട് സ്വദേശിയില്‍ നിന്നും 4.51 ലക്ഷം രൂപയുടെ 140 ഗ്രാം തൂക്കം വരുന്ന രണ്ട് സ്വര്‍ണമാലകളും പിടികൂടി. റിയാദില്‍ നിന്നെത്തിയ കോട്ടയം സ്വദേശിയുടെ പക്കല്‍ നിന്നും 7.48 ലക്ഷം രൂപയുടെ 232 ഗ്രാം തൂക്കം വരുന്ന രണ്ട് സ്വര്‍ണക്കട്ടികളും പിടിച്ചെടുത്തു. ദുബൈയില്‍ നിന്നെത്തിയ കര്‍ണാടക സ്വദേശിയുടെ പക്കല്‍ നിന്നും 8.41 ലക്ഷം രൂപയുടെ 263 ഗ്രാം സ്വര്‍ണ തകിടും 51,000 രൂപയുടെ 16 ഗ്രാം തൂക്കം വരുന്ന രണ്ട് സ്വര്‍ണ കോയിനുകളുമാണ് പിടികൂടിയത്.