ബംഗളൂരു: കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി അഹങ്കാരിയെന്ന് പ്രധാനമന്ത്രി നരേന്ദ്ര മോദി. കര്‍ണാടകയിലെ ബംഗ്രാപേട്ടില്‍ നടന്ന തെരഞ്ഞെടുപ്പ് റാലിയിലാണ് മോദി രാഹുലിനെതിരേ ആഞ്ഞടിച്ചത്.
പരിചയ സമ്പന്നരായ നിരവധി നേതാക്കള്‍ കോണ്‍ഗ്രസിലുണ്ട്. അവരെ തഴഞ്ഞ് ഒരാള്‍ക്ക് താന്‍ പ്രധാനമന്ത്രിയാകുമെന്ന് എങ്ങിനെ പ്രഖ്യാപിക്കാനാവും. രാഹുലിന്റെ പരാമര്‍ശം അഹങ്കാരമാണെന്നും മോദി പറഞ്ഞു. കര്‍ണാടക ഇന്ത്യയുടെ അഭിമാനമാണ്.
എന്നാല്‍ കഴിഞ്ഞ അഞ്ച് വര്‍ഷമായി കോണ്‍ഗ്രസ് സംസ്ഥാനത്തിന്റെ പ്രതിഛായ തകര്‍ത്തിരിക്കുകയാണ്. കോണ്‍ഗ്രസിന്റെ വര്‍ഗീയത, ജാതീയത, കുറ്റകൃത്യങ്ങള്‍, അഴിമതി, കരാര്‍ സംവിധാനം തുടങ്ങിയവയാണ് കര്‍ണാടകയെ തകര്‍ത്തതെന്നും മോദി കുറ്റപ്പെടുത്തി. 2019ലെ തെരഞ്ഞെടുപ്പില്‍ കോണ്‍ഗ്രസ് ഏറ്റവും വലിയ ഒറ്റക്കക്ഷിയായാല്‍ താന്‍ അടുത്ത പ്രധാനമന്ത്രിയാകുമെന്ന് ഒരു ചോദ്യത്തിനുത്തരമായി രാഹുല്‍ഗാന്ധി പ്രതികരിച്ചിരുന്നു.