തലശ്ശേരി: കേരളത്തിലെ ആദ്യ നഗരസഭകളിലൊന്നായ തലശ്ശേരി നഗരസഭയുടെ 150-ാം വാര്‍ഷികത്തോടനുബന്ധിച്ചും തലശ്ശേരി പ്രസ് ഫോറത്തിന്റെ നാല്‍പതാം വാര്‍ഷികാഘോഷത്തിന്റെ ഭാഗമായും നഗരസഭയും പ്രസ്‌ഫോറം ചാരിറ്റബിള്‍ ട്രസ്റ്റും സംയുക്തമായി ഫ്‌ളവര്‍ഷോ സംഘടിപ്പിക്കുന്നു.
31 മുതല്‍ ഏപ്രില്‍ 10 വരെ തലശ്ശേരി സിറ്റി സെന്റര്‍ ഗ്രൗണ്ടിലാണ് ഫ്‌ളവര്‍ഷോ സംഘടിപ്പിക്കുകയെന്നു ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. മന്ത്രിമാര്‍, രാഷ്ട്രീയ സാമൂഹ്യ-സാംസ്‌കാരിക-സാഹിത്യരംഗത്തെ പ്രമുഖര്‍, സിനിമാ സീരിയല്‍ താരങ്ങള്‍ എന്നിവര്‍ വിവിധ ദിവസങ്ങളിലെ പരിപാടികളില്‍ പങ്കെടുക്കും. പുഷ്പ-ഫല-സസ്യപ്രദര്‍ശനം, കുട്ടികള്‍ക്കും മുതിര്‍ന്നവര്‍ക്കുമുള്ള കലാകായിക മത്സരങ്ങള്‍, വിവിധ കലാപരിപാടികള്‍, അമ്യൂസ്‌മെന്റ് പാര്‍ക്ക്, വിവിധതരം സ്റ്റാളുകള്‍, ഫുഡ് കോര്‍ട്ട് എന്നിവയും ഫ്‌ളവര്‍ഷോ നഗരിയില്‍ ഉണ്ടാകും.
വാര്‍ത്താ സമ്മേളനത്തില്‍ നഗരസഭാ ചെയര്‍മാന്‍ സി.കെ രമേശന്‍, കൗസിലര്‍മാരായ പി.വി വിജയന്‍, എന്‍. അജേഷ്, പ്രസ്‌ഫോറം പ്രസിഡന്റ് കെ.ജെ ജോര്‍ജ്ജ്, സെക്രട്ടറി അര്‍ജ്ജുന്‍ ബാബുരാജ് പങ്കെടുത്തു.