കൂത്തുപറമ്പ്: കാറില്‍ കടത്തുകയായിരുന്ന 100 കുപ്പി മാഹി മദ്യവുമായി യുവാവിനെ എക്‌സൈസ് സംഘം അറസ്റ്റ് ചെയ്തു.
ഇരിട്ടി ആറളം സ്വദേശി മുള്ളന്‍കുഴിയില്‍ ടിറ്റോ എം. ജോസഫിനെ (26) ആണ് കൂത്തുപറമ്പ് എക്‌സൈസ് ഇന്‍സ്‌പെക്ടര്‍ വി.വി പ്രഭാകരനും സംഘവും പിടികൂടിയത്.
എക്‌സൈസ് കമ്മിഷണറുടെ സ്‌പെഷല്‍ സ്‌ക്വാഡ് നല്‍കിയ രഹസ്യവിവരത്തിന്റെ അടിസ്ഥാനത്തില്‍ തിങ്കളാഴ്ച രാത്രി പൂക്കോട്ടു വച്ച് നടത്തിയ വാഹന പരിശോധനയിലാണ് ഇയാള്‍ പിടിയിലായത്.
കാറിന്റെ സീറ്റിനോട് ചേര്‍ന്നു ചാക്കില്‍ സൂക്ഷിച്ച നിലയിലാണ് മദ്യക്കുപ്പികള്‍ കണ്ടെത്തിയത്. എക്‌സൈസ് ഉദ്യോഗസ്ഥര്‍ കൈകാണിച്ച് നിര്‍ത്താതെ പോയ കാറിനെ പിന്തുടര്‍ന്ന് പിടികൂടുകയായിരുന്നു. മദ്യം കടത്തിയ കാറും മദ്യവും കസ്റ്റഡിയിലെടുത്തു.
എക്‌സൈസ് പ്രിവന്റിവ് ഓഫിസര്‍മാരായ വി.കെ ഷിബു, ടി. രവീന്ദ്രന്‍, സിവില്‍ ഓഫിസര്‍മാരായ പി. ജലീഷ്, പി.ടി സജിത്ത്, അജേഷ്, കെ. ഇസ്മായില്‍ എന്നിവര്‍ എക്‌സൈസ് സംഘത്തിലുണ്ടായിരുന്നു. പ്രതിയെ കൂത്തുപറമ്പ് ജുഡിഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി.