കാഞ്ഞങ്ങാട്: ടയര്‍ മോഷണവുമായി ബന്ധപ്പെട്ട് രണ്ടംഗ സംഘത്തെ ഹൊസ്ദുര്‍ഗ് പൊലിസ് പിടികൂടി. ഷംസീര്‍,(19) മുനീര്‍(18) എന്നിവരെയാണു പൊലിസ് പിടികൂടിയത്. പാതക്കരികില്‍ നിര്‍ത്തിയിടുന്ന വാഹനങ്ങളുടെ ടയറുകള്‍ മോഷ്ടിക്കുന്നതാണ് ഇവരുടെ രീതി. കഴിഞ്ഞ ദിവസം രാത്രി അവിക്കരയിലെ വിനുജേക്കബിന്റെ കാറിന്റെ ടയറുകള്‍ മോഷണം പോയതോടെയാണ് ഇവര്‍ പൊലിസ് പിടിയിലായത്. ടയര്‍ കാണാതായതിനെ തുടര്‍ന്ന് ഇയാള്‍ ഹൊസ്ദുര്‍ഗ് പൊലിസില്‍ പരാതി നല്‍കി. ഇന്നലെ അതിരാവിലെ നഗരത്തില്‍ പട്രോളിങ് നടത്തുകയായിരുന്ന പൊലിസ് സംഘം സംശയാസ്പദമായ സാഹചര്യത്തില്‍ ഇരുവരെയും കസ്റ്റഡിയില്‍ എടുത്ത് ചോദ്യം ചെയ്തതോടെയാണ് ഇവര്‍ ടയര്‍ മോഷ്ടാക്കളാണെന്നു കണ്ടെത്തിയത്.