ന്യൂഡല്‍ഹി: പഞ്ചാബ് തെരഞ്ഞെടുപ്പില്‍ വോട്ടിങ് യന്ത്രങ്ങളില്‍ ക്രമക്കേട് നടന്നെന്ന് ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍. പല മണ്ഡലങ്ങളിലും എ.എ.പി വളണ്ടിയര്‍മാരുടെ എണ്ണത്തേക്കാള്‍ കുറവ് വോട്ടുകളാണ് പാര്‍ട്ടിക്ക് ലഭിച്ചത്. എ.എ.പിയുടെ 20 മുതല്‍ 25 ശതമാനം വരെ വോട്ടുകള്‍ ബി.ജെ.പി- അകാലിദള്‍ സഖ്യത്തിന് ലഭിച്ചുവെന്നും കെജ്‌രിവാള്‍ ആരോപിക്കുന്നു.

പഞ്ചാബില്‍ എ.എ.പി വിജയിക്കുമെന്നാണ് കരുതിയത്. ചില എക്‌സിറ്റ് പോളുകളും പഞ്ചാബില്‍ എ.എ.പിയുടെ വിജയം പ്രവചിച്ചിരുന്നു. എന്നാല്‍ എന്താണ് സംഭവിച്ചതെന്ന് അറിയില്ലെന്നും അദ്ദേഹം പറഞ്ഞു.

ഇലക്ട്രോണിക് വോട്ടിങ് മെഷീനില്‍ കൃത്രിമം നടത്താനാകുമെന്ന് താന്‍ പറഞ്ഞതല്ല, സുപ്രിംകോടതി നേരത്തെ തന്നെ ഇക്കാര്യം ചൂണ്ടിക്കാട്ടിയിരുന്നുവെന്നും അദ്ദേഹം പറഞ്ഞു.

ഡല്‍ഹിയിലെ തദ്ദേശ സ്ഥാപനങ്ങളിലേക്ക് നടക്കുന്ന തിരഞ്ഞെടുപ്പില്‍ ഇലക്ട്രോണിക് വോട്ടിങ് മെഷീനുകള്‍ക്ക് പകരം ബാലറ്റ് പേപ്പറുകള്‍ ഉപയോഗിക്കണമെന്ന് കെജ്‌രിവാള്‍ കഴിഞ്ഞ ദിവസം ആവശ്യപ്പെട്ടിരുന്നു. ഇതേ ആവശ്യവുമായി കോണ്‍ഗ്രസ് നേതാക്കളും രംഗത്തെത്തിയിരുന്നു. എന്നാല്‍ ആവശ്യം തെരഞ്ഞെടുപ്പ് കമ്മിഷന്‍ തള്ളി.

ഉത്തര്‍പ്രദേശ് തെരഞ്ഞെടുപ്പില്‍ ബി.ജെ.പിയുടെ വിജയത്തിന് പിന്നാലെ വോട്ടിങ് യന്ത്രങ്ങളില്‍ ക്രമക്കേടുകള്‍ നടന്നിട്ടുണ്ടെന്ന ആരോപണവുമായി മായാവതിയും രംഗത്തുവന്നിരുന്നു.