കണ്ണൂര്‍: എസ്.എഫ്.ഐ കണ്ണൂര്‍ ജില്ലാ സമ്മേളനത്തിനു വേണ്ടി ഇന്നും നാളെയും നടത്താന്‍ നിശ്ചയിച്ച ഡിഗ്രി രണ്ടാം സെമസ്റ്റര്‍ പരീക്ഷ മാറ്റിയതില്‍ പ്രതിഷേധിച്ച് കെ.എസ്.യു പ്രവര്‍ത്തകര്‍ കണ്ണൂര്‍ സര്‍വ്വകലാശാല പ്രൊ. വൈസ് ചാന്‍സിലറെ ഉപരോധിച്ചു. 11 ന് മാത്രമെ വൈസ് ചാന്‍സിലര്‍ സ്ഥലത്ത് എത്തുകയുള്ളു. ഈ സാഹചര്യത്തില്‍ പരീക്ഷ തീയതി ഇനിയും മാറ്റാനാവില്ലെന്നും പരീക്ഷ മാറ്റാനിടയായ ബാഹ്യ ഇടപെടലിനെകുറിച്ച് വൈസ് ചാന്‍സിലര്‍ എത്തിയതിന് ശേഷം അന്വേഷണം നടത്തുമെന്നും രേഖാമൂലം ഉറപ്പ് നല്‍കിയതിനെ തുടര്‍ന്നാണ് ഉപരോധ സമരം അവസാനിപ്പിച്ചത്. ഉപരോധ സമരത്തിന് കെ.എസ്.യു ജില്ലാ പ്രസിഡന്റ് മുഹമ്മദ് ഷമ്മാസ്, ഷിബിന്‍ ഷിബു, ഫര്‍ഹാന്‍ മുണ്ടേരി, നവനീത് നാരായണന്‍, അന്‍സില്‍, റനീഷ് വി.കെ നബീല്‍ വളപട്ടണം, പ്രയാഗ് നേതൃത്വം നല്‍കി.