കുമ്പള: മംഗല്‍പാടി പച്ചമ്പളയില്‍ പുലി ഇറങ്ങിയതായി നാട്ടുകാര്‍. കഴിഞ്ഞദിവസം പച്ചമ്പളയ്ക്ക് സമീപത്തുവച്ച് പ്രദേശവാസിയായ ഒരു സ്ത്രീയാണ് രണ്ട് പുലിക്കുട്ടികളെ കണ്ടത്. തുടര്‍ന്ന് സ്ത്രീ ബഹളംവച്ചതോടെ പുലികള്‍ ഓടിപ്പോവുകയായിരുന്നുവെന്ന് പ്രദേശവാസികള്‍ പറഞ്ഞു.
പുലിയെ കണ്ട വാര്‍ത്ത പരന്നതിനെ നാട്ടുകാര്‍ ഏറെ ഭീതിയിലാണ് കഴിയുന്നത്. എന്നാല്‍ രാത്രിയും വെളുപ്പിനും പള്ളിയിലേക്കു പോകുന്നവരും പുലിയെ കണ്ടതായി പറഞ്ഞു.
അതേസമയം വിവരം ഫോറസ്റ്റ് അധികൃതരെ അറിയിച്ചിട്ടും ഡ്രൈവര്‍ ഇല്ലെന്ന കാരണത്താല്‍ സ്ഥലത്തെത്തിയില്ലെന്ന് ആക്ഷേപമുണ്ട്.
സമീപത്തെ കാടുകളിലും പരിസരത്തും നാട്ടുകാര്‍ തെരച്ചില്‍ നടത്തിവരികയാണ്.
സംഭവം അറിഞ്ഞ് കുമ്പള അഡീഷണല്‍ എസ്.ഐ ശിവദാസന്‍ സ്ഥലത്ത് എത്തുകയും നാട്ടുകാരുടെ സാന്നിധ്യത്തില്‍ ഫോറസ്റ്റ് അധികൃതരെ ബന്ധപ്പെടുകയും ചെയ്തു. കഴിഞ്ഞമാസം കുമ്പള കൊടിയമ്മയിലും നായിക്കാപ്പിലും പുലിയെ കണ്ടെത്തിയിരുന്നു.