തൊടുപുഴ: ഹരിത കേരളം പദ്ധതിയുടെ ഭാഗമായി സംസ്ഥാന സര്‍ക്കാര്‍ ആവിഷ്‌കരിച്ചിട്ടുള്ള മാലിന്യ നിര്‍മ്മാര്‍ജ്ജന പദ്ധതികള്‍ ജില്ലയിലെ സര്‍ക്കാര്‍ ഓഫിസിലേക്കും വ്യാപിപ്പിക്കുന്നു.
 ജില്ലാ ശുചിത്വമിഷന്റെ നേതൃത്വത്തില്‍ നടപ്പിലാക്കുന്ന പദ്ധതിയില്‍ മിഷനോടൊപ്പം ജില്ലാ ഭരണകൂടവും കട്ടപ്പന ആസ്ഥാനമായി പ്രവര്‍ത്തിക്കുന്ന എക്‌സ് സര്‍വിസ്‌മെന്‍ ചാരിറ്റബിള്‍ ട്രസ്റ്റും കൈകോര്‍ക്കും. പദ്ധതിയുടെ ഭാഗമായി സിവില്‍ സ്റ്റേഷന്‍ പരിസരം ഗ്രീന്‍ സോണായി പ്രഖ്യാപിക്കുകയും ഗ്രീന്‍സോണില്‍ ഉള്‍പ്പെടുന്ന സ്ഥാപനങ്ങളിലും ഓഫിസുകളിലും പ്ലാസ്റ്റിക്ക്, ഡിസ്‌പോസിബിള്‍ ഉല്‍പ്പന്നങ്ങളുടെ ഉപയോഗത്തിന് കര്‍ശന നിയന്ത്രണം ഏര്‍പ്പെടുത്തുകയും ചെയ്തു. കലക്ടറേറ്റ് പരിസരത്ത് പ്രവര്‍ത്തിക്കുന്ന കാന്റീനുകളില്‍ ഭക്ഷണം വിതരണം ചെയ്യുന്നതിന് ഡിസ്‌പോസിബിള്‍ ഉല്‍പന്നങ്ങള്‍ ഉപയോഗിക്കുന്നതിനും നിരോധനം ഏര്‍പ്പെടുത്തിയിട്ടുണ്ട്.
അജൈവമാലിന്യങ്ങളായ പേപ്പര്‍, ഇലക്‌ട്രോണിക് മാലിന്യങ്ങള്‍ മുതലായവ എക്‌സ് സര്‍വിസ്‌മെന്‍ ചാരിറ്റബിള്‍ ട്രസ്റ്റിന്റെ നേതൃത്വത്തില്‍ സംഭരിക്കുകയും റീസൈക്ലിങിനായി ബന്ധപ്പെട്ട ഏജന്‍സികള്‍ക്ക് കൈമാറുകയും ചെയ്യും.
പദ്ധതികളുടെ വിജയത്തിനായി എല്ലാ വകുപ്പുകളിലെയും ജീവനക്കാരെ ഉള്‍പ്പെടുത്തി ബോധവത്കരണ ക്ലാസ് സംഘടിപ്പിച്ചു.
ജില്ലാ ശുചിത്വമിഷന്‍ കോഓര്‍ഡിനേറ്റര്‍ സാജു സെബാസ്റ്റ്യന്‍, എക്‌സ് സര്‍വിസ് മെന്‍ ചാരിറ്റബിള്‍ ട്രസ്റ്റിന്റെ ചെയര്‍മാന്‍ വര്‍ഗ്ഗീസ്, സെക്രട്ടി ടോമി ക്ലാസുകള്‍ നയിച്ചു.