കൊയിലാണ്ടി: വിദ്യാര്‍ഥികള്‍ക്ക് നോട്ട് ബുക്കുകള്‍ കുറഞ്ഞ വിലക്ക് വില്‍പ്പനക്കൊരുക്കി കൊയിലാണ്ടി ഗേള്‍സ് സ്‌കൂള്‍ ശ്രദ്ധേ നേടുന്നു.
പുറംചട്ടകളില്‍ സ്‌കൂളിന്റെ പേരും ഫോട്ടോകളും പ്രിന്റ് ചെയ്ത് ഗുണനിലവാരം ഉറപ്പ് വരുത്തിക്കൊണ്ടാണ് മികവിന്റെ കേന്ദ്രമായി മാറിയ കൊയിലാണ്ടി ഗേള്‍സ് ഹയര്‍ സെക്കന്‍ഡറി സ്‌കൂള്‍ വിദ്യാഥികള്‍ക്കും രക്ഷിതാക്കള്‍ക്കും സഹായകരമായ പദ്ധതിയുമായി രംഗത്ത് വന്നിരിക്കുന്നത്. സ്വകാര്യ സ്‌കൂളുകള്‍ പൊതുവിപണിയെ ആശ്രയിച്ച് പുസ്തകങ്ങള്‍ വില്‍പ്പനക്ക് എത്തിക്കുന്നതിനിടയിലാണ് സ്വന്തമായി നോട്ട് ബുക്കുകള്‍ പുറത്തിറക്കി കൊയിലാണ്ടി ഗേള്‍സ് മാതൃകയാകുന്നത്. പൊതുവിപണിയില്‍ ലഭിക്കുന്നതിനെക്കാള്‍ വിലകുറവും, ഉയര്‍ന്ന നിലവാരവും ഉറപ്പുവരുത്തിയിട്ടുണ്ട്. ആറ് വര്‍ഷം തുടര്‍ച്ചയായി എസ്.എസ്. എല്‍.എസി പരീക്ഷയില്‍ നൂറ് ശതമാനം വിജയം കരസ്ഥമാക്കിയ ഈ സര്‍ക്കാര്‍ സ്‌കൂള്‍ ഈ പ്രാവശ്യം നൂറ് ശതമാനം വിജയവും 79 എപ്ലസുമായി ജില്ലയില്‍ ഒന്നാം സ്ഥാനവും, സംസ്ഥാന തലത്തില്‍ മൂന്നാം സ്ഥാനവും നേടിയിട്ടുണ്ട്. ജില്ലയില്‍ 3000ത്തിലധികം പെണ്‍കുട്ടികള്‍ പഠിക്കുന്ന ഏക പെണ്‍പള്ളിക്കൂടം എന്ന പ്രത്യേകതയും ഈ സര്‍ക്കാര്‍ വിദ്യാലയത്തിനുണ്ട്. വിതരണോദ്ഘാടനം നഗരസഭാ ചെയര്‍മാന്‍ അഡ്വ. കെ. സത്യന്‍ നിര്‍വഹിച്ചു. പി.ടി.എ പ്രസിഡന്റ് എ. സജീവ് കുമാര്‍ അധ്യക്ഷനായി. ബി.പി.ഒ എം.ജി ബല്‍രാജ്, പ്രിന്‍സിപ്പല്‍ എ.പി പ്രബീത്, അന്‍സാര്‍ കൊല്ലം, ജി.കെ വേണു, ആര്‍.എം രാജന്‍, പി. രാഗേഷ് കുമാര്‍ സംസാരിച്ചു.