തുറവൂര്‍: തുറവൂര്‍ താലൂക്കാശുപത്രിയില്‍ തറയോട് പാകലും കാന പണിയും ആരംഭിച്ചു. പട്ടണക്കാട് ബ്ലോക്ക് പഞ്ചായത്ത് എട്ട് ലക്ഷം രൂപയാണ് ഈ പദ്ധതിക്കായി ചെലവഴിക്കുന്നത്.
ഒന്നരക്കോടി രൂപ മുടക്കി നിര്‍മിച്ച പുതിയ ആശുപത്രി കെട്ടിടവും അമ്പത്തിമൂന്ന് ലക്ഷം രൂപ മുടക്കി നിര്‍മിച്ച അഡ്മിനിസ്‌ട്രേറ്റീവ് ബ്ലോക്കും പണിതെങ്കിലും കോമ്പൗണ്ട് വൃത്തിഹീനമായും കണ്ടും കുഴിയുമായി കിടക്കുകയായിരുന്നു. രോഗികളുമായി എത്തുന്ന വാഹനങ്ങളും ആംബുലന്‍സും വളരെ പ്രയാസപ്പെട്ടാണ് പോയിക്കൊണ്ടിരുന്നത്. മഴക്കാലത്ത് പ്രധാന കവാടത്തിനു മുന്നില്‍ വെള്ളം കെട്ടി നില്‍ക്കുന്നത് പതിവാണ്.
ഇതൊഴിവാക്കാനാണ് ഗേറ്റിന് വടക്കോട്ട് കാന പണിയുന്നത്. ആശുപത്രിയില്‍ നടക്കുന്ന വികസന പ്രവര്‍ത്തനങ്ങളില്‍ വ്യാപക അഴിമതികളാണ് നടക്കുന്നതെന്ന് നാട്ടുകാര്‍ പറഞ്ഞു.