മലപ്പുറം: അറേബ്യന്‍ മരുഭൂമിയിലെ വിഷപ്പാമ്പുകളെ കുറിച്ച് പഠിക്കാന്‍ മലയാളിയായ ഗവേഷകനും പാമ്പുപിടുത്തക്കാരനും ഗള്‍ഫിലേക്ക്. യു.എ.ഇയിലെ രാജകുടുംബാംഗത്തിന്റെ ക്ഷണം സ്വീകരിച്ചാണ് കാലിക്കറ്റ് യൂനിവേഴ്‌സിറ്റിയിലെ ജന്തുശാസ്ത്ര വിഭാഗം അസിസ്റ്റന്റ് പ്രൊഫസര്‍ ഡോ. സുബൈര്‍ മേടമ്മലും പാമ്പുപിടിത്തക്കാരനായ ഷംസുദ്ദീന്‍ ചെര്‍പ്പുളശേരിയും വിദേശത്തേക്ക് യാത്രയാകുന്നത്. യു.എ.ഇയിലെ മരുഭൂമിയില്‍ കാണപ്പെടുന്ന വിഷപ്പാമ്പുകളെ കുറിച്ചുള്ള പഠനത്തിനായി ഇവര്‍ വെള്ളിയാഴ്ച യാത്ര തിരിക്കും.
മരുഭൂമിയില്‍ കാണുന്ന പാമ്പുകള്‍ ഉഗ്രവിഷമുള്ളവയായതിനാല്‍ ഇവയെ കുറിച്ചുള്ള പഠനം അതിസാഹസികമാണ്.
വിഷപ്പാമ്പുകളെ ആവാസവ്യവസ്ഥയെ കുറിച്ചും സ്വഭാവ സവിശേഷതകളെ കുറിച്ചും അവയുടെ വംശ സംരക്ഷണത്തെ കുറിച്ചും പഠനവിധേയമാക്കുകയാണ് ലക്ഷ്യം.