അങ്കമാലി: വീടിന്റെ ജനലഴി അറുത്തുമാറ്റി വീടിനകത്ത് മോഷണം. 17000 രൂപ നഷ്ടമായി. അങ്കമാലി കെ.എസ്.ആര്‍.ടി.സി ബസ് സ്റ്റേഷനു സമീപം കൂരന്‍ യോഹന്നാന്റെ വീട്ടിലാണ് മോഷണം നടന്നത്. ഇരുനില വീടിന്റെ പുറകില്‍ ഗോവണി വച്ചു കയറി ഹാളിന്റെ  ഇരുമ്പ്  ജനലഴികള്‍ അറുത്തുമാറ്റിയാണ് അകത്തു കടന്നത്. മെഷീന്‍ ഉപയോഗിച്ചാണ് അഴികള്‍ അറുത്തിട്ടുള്ളത്. അകത്തു കടന്ന മോഷ്ടാവിന് കിടപ്പുമുറികളിലൊന്നും പ്രവേശിക്കാനായില്ല. ഹാളിന്റെ മേശമേലിരുന്ന പഴ് സില്‍ നിന്നുമാണ് പണം നഷ്ടപ്പെട്ടത്. അകത്ത് കാല്‍പെരുമാറ്റം കേട്ട് വീട്ടുകാര്‍ എഴുന്നേറ്റ തിനെ തുടര്‍ന്ന് തുറന്നിട്ട വാതിലിലൂടെ ഓടി രക്ഷപ്പെടുകയായിരുന്നു.
വീട്ടുകാരെ അപായപ്പെടുത്താനായി കൊണ്ടുവന്നിരുന്ന കോടാലി മുറിയില്‍ നിന്നും പോലീസ് കണ്ടെത്തി .അങ്കമാലി എസ്.ഐ കെ.എന്‍ മനോജും വിരലടയാള വിദഗ്ധരും വീട്ടിലെത്തി പരിശോധനകള്‍ നടത്തി. ഇതിനടുത്തെ മറ്റൊരു വീട്ടില്‍ ഒരാഴ്ച മുന്‍പും മോഷണം ഉണ്ടായിരുന്നു. വാതില്‍ തുറന്ന് അകത്തു കയറിയ മോഷ്ടാവ് 26000 രൂപ അപഹരിച്ചിരുന്നു. ഈ പ്രദേശത്ത് പൊലിസ് പട്രോളിങ് ശക്തമാക്കണമെന്ന് റസിഡന്റ്‌സ് അസോസിയേഷന്‍ ആവശ്യപ്പെട്ടു.