തൃശൂര്‍: പരിസ്ഥിതി സൗഹൃദ ഹരിത ക്ഷേത്രം പദ്ധതിക്ക് മുന്‍ഗണന നല്‍കി കൊച്ചിന്‍ ദേവസ്വം ബോര്‍ഡ്  2017-2018 സാമ്പത്തിക വര്‍ഷത്തേക്കുള്ള ബജറ്റ് അവതരിപ്പിച്ചു. 185.22 കോടി വരവും 181.01 കോടി ചിലവും പ്രതീക്ഷിക്കുന്ന മിച്ച ബജറ്റാണ് അവതരിപ്പിച്ചത്. ക്ഷേത്രഭൂമികള്‍ ഹരിതാഭമാക്കുന്നതിനും, പരിസ്ഥിതി സംരക്ഷണത്തിനും, ജലസ്രേതസ്സുകള്‍ നിലനിര്‍ത്തുന്നതിനും ഹരിതക്ഷേത്രം പദ്ധതി, വാണിജ്യ പ്രാധാന്യമുള്ള ദേവസ്വം സ്ഥലങ്ങളില്‍ ആധുനിക രീതിയിലുള്ള ഷോപ്പിങ്ങ് മാളുകള്‍, കല്യാണമണ്ഡപങ്ങള്‍, കൈലാസം ഷോപ്പിങ്ങ് ക്ലോപ്ലക്‌സിന്റെ ആദ്യഘട്ടത്തിന്റെ രണ്ടാം ഭാഗം നിര്‍മാണം, തൃശൂര്‍ ശ്രീവടുക്കുന്നാഥന്‍ ക്ഷേത്ര മൈതാനത്തിന്റെ സമ്പൂര്‍ണ സൗന്ദര്യവല്‍ക്കരണം, ക്ഷേത്രങ്ങളോടനുബന്ധിച്ച് ശാന്തിമഠങ്ങളും, ശൗചാലയങ്ങളും നിര്‍മിക്കുക,  ഭക്തജനങ്ങള്‍ക്ക് ക്ഷേത്രങ്ങളില്‍ വെച്ച് സംഭവിക്കുന്ന അപകടങ്ങള്‍ക്ക് ഇന്‍ഷുറന്‍സ് പരിരക്ഷ, നിര്‍ദ്ധരരായ ഭക്തജനങ്ങള്‍ക്ക് മാനദണ്ഡങ്ങളുടെ അടിസ്ഥാനത്തില്‍ ചികിത്സ ധനസഹായം, ജിര്‍ണ്ണാവസ്ഥയിലുള്ള ക്ഷേത്രങ്ങളുടെയും വിദ്യാഭ്യാസ സ്ഥാപനങ്ങളുടെയും നവീകരണ ജോലികള്‍, വിദ്യാഭ്യാസ സ്ഥാപനങ്ങളുടെ ആധുനികവല്‍ക്കരണം, സൗരോര്‍ജ്ജ പദ്ധതി, ക്ഷേത്ര കലാവിദ്യാപീഠം, ക്ഷേത്ര ജീവനക്കാര്‍ക്ക് മെഡിക്കല്‍ റീബേഴ്‌സ്‌മെന്റ്, ക്ഷേത്ര സാംസ്‌ക്കാരിക മ്യൂസിയം, ശുചിത്വമിഷനുമായി ബന്ധപ്പെട്ട് മേജര്‍ ക്ഷേത്രങ്ങളില്‍ സീവേജ് ട്രീറ്റ്‌മെന്റ് പ്ലാന്റ്, ചോറ്റാനിക്കര, തൃപ്രയാര്‍, കൊടുങ്ങല്ലൂര്‍ എന്നീ ക്ഷേത്രങ്ങളില്‍ മാസ്റ്റര്‍പ്ലാന്‍ അനുസരിച്ചുള്ള നിര്‍മാണ പ്രവര്‍ത്തനങ്ങള്‍, പെരുവന്‍മല ക്ഷേത്രത്തോടനുബന്ധിച്ചുള്ള 40 ഏക്കറോളം വരുന്ന ഭൂമിയില്‍ പില്‍ഗ്രിം ടൂറിസം, സര്‍ക്കാര്‍ ഫണ്ട് ഉപയോഗിച്ച് വകുപ്പിലെ 7 ക്ഷേത്രങ്ങളില്‍ ശബരിമല ഇടത്താവളം തുടങ്ങിവയാണ് പ്രധാന പദ്ധതികള്‍.
പ്രസിഡന്റ് ഡോ.എം കെ സുദര്‍ശന്‍ അധ്യക്ഷനായി. കെ എന്‍ ഉണ്ണികൃഷ്ണന്‍,  അഡ്വ. ടി.എന്‍ അരുണ്‍കുമാര്‍, സ്‌പെഷ്യല്‍ ദേവസ്വം കമ്മീഷ്ണര്‍ ആര്‍ ഹരി, സെക്രട്ടറി വി .എ ഷീജ, കെ രാമചന്ദ്രന്‍, എക്‌സിക്യൂട്ടീവ് എന്‍ജനീയര്‍ കെ .കെ മനോജ്, പി.വി സുജാതഭായ്, പി രാജേന്ദ്രപ്രസാദ്, പി.വി മായ, അസിസ്റ്റന്റ് ഇ .കെ മനോജ് പങ്കെടുത്തു.