തലശ്ശേരി: മാതാപിതാക്കളെയും മകളെയും വിഷം നല്‍കി കൊലപ്പെടുത്തിയ കേസില്‍ പ്രതിയായ പിണറായി പടന്നക്കരയിലെ വണ്ണത്താന്‍ വീട്ടില്‍ സൗമ്യ(28)യെ തലശ്ശേരി ചീഫ് ജുഡീഷ്യല്‍ മജിസ്‌ട്രേറ്റ് കോടതി 21 വരെ റിമാന്‍ഡ് ചെയ്തു. സൗമ്യ ഉപയോഗിച്ച ഫോണ്‍ പരിശോധനയില്‍ നിന്നും നിര്‍ണായക വിവരം പൊലിസിന് ലഭിച്ചിട്ടുണ്ട്. മകള്‍ ഐശ്വര്യ മരിക്കുന്നതിന് ഏതാനും ദിവസം മുന്‍പ് സൗമ്യ കാമുകനയച്ച ഒരു എസ്.എം.എസ് സന്ദേശം അന്വേഷണ സംഘത്തിന് നിര്‍ണായക തെളിവായി ലഭിച്ചിട്ടുണ്ട്. എനിക്ക് അച്ഛനെയും അമ്മയെയും മകളെയും നഷ്ടപ്പെടുമെന്ന പേടിയുണ്ട്. മനസിന് വല്ലാത്ത വിഷമം തോന്നുന്നു. എങ്കിലും നിന്റെ കൂടെ ജീവിക്കണമെന്നുണ്ട്'എന്നായിരുന്നു സന്ദേശം.
മാതാപിതാക്കളെ ഭക്ഷണത്തില്‍ എലിവിഷം കലര്‍ത്തി നല്‍കി കൊലപ്പെടുത്തിയ കുറ്റത്തിന് നേരത്തെ കണ്ണൂര്‍ വനിതാ ജയിലില്‍ റിമാന്‍ഡിലായിരുന്ന സൗമ്യ മകള്‍ ഐശ്വര്യയെ(8) കൂടി സമാന രീതിയില്‍ കൊലപ്പെടുത്തിയെന്ന കണ്ടെത്തലിനെ തുടര്‍ന്ന് കഴിഞ്ഞ ദിവസം അന്വേഷണ സംഘത്തിന് കസ്റ്റഡിയില്‍ വിട്ടുനല്‍കിയിരുന്നു. തെളിവെടുപ്പുകള്‍ പൂര്‍ത്തിയാക്കിയ ശേഷം ഇന്നലെ വൈകിട്ടാണ് തിരികെ ഹാജരാക്കിയത്. അഞ്ച് മൊബൈല്‍ ഫോണും ഏഴ് സിംകാര്‍ഡുകളും പ്രതി ഉപയോഗിച്ചെന്ന് കണ്ടെത്തിയിട്ടുണ്ട്.
മൊബൈല്‍ ഫോണില്‍ ഒന്ന് കാമുകനായ യുവാവ് പ്രണയസമ്മാനമായി നല്‍കിയതാണെന്ന് സൗമ്യ പൊലിസിനോട് വെളിപ്പെടുത്തിയിട്ടുണ്ട്. എന്നാല്‍ എല്ലാവരെയും കൊന്നത് താന്‍ ഒറ്റയ്ക്കാണെന്നാണ് സൗമ്യ ആവര്‍ത്തിക്കുന്നത്. ജാമ്യം വേണ്ടെന്നാണ് നിലപാട്. എങ്കിലും നിയമ സഹായത്തിനായി ഒരു വനിതാ അഭിഭാഷകയെ കോടതി അനുവദിച്ചിട്ടുണ്ട്. ഇതിനിടെ കാഞ്ഞങ്ങാട്ടുകാരനായ ഒരു അഭിഭാഷകന്‍ സൗമ്യയുടെ കേസ് ഏറ്റെടുക്കാന്‍ തയാറായി കോടതിയെ സമീപിച്ചുവെങ്കിലും അനുവദിച്ചിട്ടില്ല.