കണ്ണൂര്‍: മണല്‍ ലോറികള്‍ തട്ടിയെടുക്കുന്ന സംഘത്തിനെതിരെ കണ്ണൂര്‍ ടൗണ്‍ പൊലിസ് ഒരു കേസുകൂടി എടുത്തു. മംഗളൂരു പാലത്തൂര്‍ സ്വദേശി ബുല്‍മര്‍ ഹൗസിലെ ഖാദറിന്റെ ഉടമസ്ഥതയിലുള്ള മണല്‍ ലോറി തട്ടിയെടുത്തുവെന്ന പരാതിലാണ് കേസെടുത്തത്. കഴിഞ്ഞ ദിവസമാണ് ഇരിവേരിയിലെ സി.എം അരുണ്‍ലാല്‍(26), ഏച്ചൂര്‍ വട്ടപ്പൊയിലില്‍ ജമീല മന്‍സിലില്‍ കെ.പി മുഹമ്മദ്(27), കാനച്ചേരി ചെറിയ വീട്ടില്‍ കെ.പി മുഷ്‌റഫ്(24), നീലഗിരി നാടുകാണിയിലെ പടിപ്പുരയ്ക്കല്‍ സുമേഷ്(27), ഏച്ചൂര്‍ മുണ്ടേരി കോട്ടത്തെ സുഹമനിലയത്തില്‍ പി വിനോദ് എന്നിവരെ കണ്ണൂര്‍ ടൗണ്‍ പൊലിസ് പിടികൂടിയത്. മംഗളൂരുവില്‍ നിന്ന് മണല്‍ കയറ്റിവരുന്ന ലോറികള്‍ ആളൊഴിഞ്ഞ സ്ഥലത്ത് തടഞ്ഞുനിര്‍ത്തി ലോറിയിലുള്ളവരെ ബന്ദികളാക്കി മണല്‍തട്ടിയെടുക്കുകയായിരുന്നു സംഘത്തിന്റെ രീതി. പിടിയിലായ സംഘത്തെ കോടതി റിമാന്‍ഡ് ചെയ്തു.