കാസര്‍കോട്: ജില്ലയിലെ കോണ്‍ഗ്രസ് സ്ഥാനാര്‍ഥികളുടെ പരാജയവും യു.ഡി.എഫിന്റെ പൊതു പ്രകടനവും വിലയിരുത്താനായി നിയോഗിച്ച അന്വേഷണ കമ്മിഷനു മുന്നില്‍ വന്നത് പ്രധാനമായും വോട്ടു ചോര്‍ച്ചയെ കുറിച്ചുള്ള പരാതികള്‍. മിക്ക മണ്ഡലങ്ങളിലും യു.ഡി.എഫ് കേന്ദ്രങ്ങളില്‍ വന്‍ വോട്ടു ചോര്‍ച്ച ഉണ്ടായെന്ന പരാതി ഉയര്‍ന്നു.
യു.ഡി.എഫ് കേന്ദ്രങ്ങളില്‍ വോട്ടു ചോര്‍ച്ചയുണ്ടായപ്പോള്‍ ഇടതു കേന്ദ്രങ്ങളില്‍ യു.ഡി.എഫ് അനുകൂലമായ വോട്ടൊഴുക്കുണ്ടായിട്ടുണ്ട്. ചില നേതാക്കളുടെയും പ്രവര്‍ത്തകരുടെയും കൃത്യമായ ഇടപെടല്‍ ഇല്ലാത്തതാണ് ഇത്തരത്തില്‍ യു.ഡി.എഫ് കേന്ദ്രങ്ങളില്‍ വോട്ടു ചോരാന്‍ കാരണമായതെന്നാണ് പൊതു വികാരം.
തൃക്കരിപ്പൂര്‍, ഉദുമ മണ്ഡലങ്ങളില്‍ തെരഞ്ഞെടുപ്പ് പ്രചാരണ പ്രവര്‍ത്തനം ചിലയിടങ്ങളില്‍ നിര്‍ജീവമായിരുന്നുവെന്നും ഉദുമയിലെ തോല്‍വിയും തൃക്കരിപ്പൂരിലെ ഇടതു സ്ഥാനാര്‍ഥിയുടെ വന്‍ ഭൂരിപക്ഷവും ചര്‍ച്ച ചെയ്യപ്പെടേണ്ടതാണെന്നും അന്വേഷണ കമ്മിഷനു  മുമ്പാകെ എത്തിയവര്‍ ആവശ്യപ്പെട്ടു.